شىعىس قازاقستاندا كۇن سايىن 15 تەن استام دالا ءورتى تىركەلۋدە
ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، قۇتقارۋشىلار كۇن سايىن تاۋلىگىنە 15-20 رەتكە دەيىن دالا ءورتىن سوندىرۋگە بارادى. مۇنداي ورتتەردى اۋىزدىقتاۋدىڭ قيىندىعى - وت ءىرى اۋماققا جىلدام تاراپ كەتەدى.
«ءورت قاۋپى جوعارى كەزەڭدە وڭىردە ءورت ينسپەكتورلارى، ورمانشىلار، پوليسيا قىزمەتكەرلەرى جانە جەرگىلىكتى اتقارۋشى ورگان وكىلدەرى قاتارىنان جالپى سانى 300 گە جۋىق ادامنان تۇراتىن 46 ءموبيلدى توپ قۇرىلعان. ولار 280 نەن استام رەت رەيدكە شىقتى. سونىڭ ناتيجەسىندە، ءورت قاۋىپسىزدىگى تالاپتارىن بۇزعان 32 ادام اكىمشىلىك جاۋاپكەرشىلىككە تارتىلدى»، - دەيدى دەپارتامەنتتىڭ مەملەكەتتىك ءورت باقىلاۋ باسقارماسىنىڭ باستىعى نۇرجان ءومىرجانوۆ.
وسى رەتتە، وبلىستىق ت ج د قىزمەتكەرلەرى تۇرعىندارعا قاۋىپسىزدىك ەرەجەلەرىن ەسكە سالدى:
- تەرەك مامىعى وت ۇشقىنىنان دا تۇتانادى، تەز جانىپ، جان جاققا تارايدى.
- كوممۋنالدىق قىزمەتتەر مەن حالىق اۋلالاردى، گاراج كووپەراتيۆتەرىن قوقىستان تازارتۋى كەرەك.
- سوندىرىلمەگەن تەمەكى تۇقىلىن جەرگە تاستاماڭىز. اتا- انالار بالالارىنا سىرىڭكەمەن ويناۋدىڭ قاۋىپتىلىگى تۋرالى ءتۇسىندىرۋى ءتيىس.
- دالادا ءشوپ ورتەمەڭىز.
- ساياجايلاردا العاشقى ءورت ءسوندىرۋ قۇرالدارىن قولجەتىمدى جەردە ۇستاڭىز.