قازاقستاندا ينفلياتسيا قارقىن الىپ، ءبىر ايدا 15 پايىزعا جەتتى

نۇر-سۇلتان. قازاقپارات - شىلدە ايىندا ەلدە جىلدىق ينفلياتسيا قارقىن الىپ، 15,0 پايىزدى (ماۋسىمدا - 14,5 پايىز) قۇرادى.

بۇل تۋرالى قازاقپارات ۇلتتىق بانككە سىلتەمە جاساپ حابارلايدى.

ايماقتار اراسىندا جىلدىق ينفلياتسيا 16 وڭىردە جەدەلدەپ، 3 وبلىستا باسەڭدەدى، 1 وڭىردە وزگەرىس بولعان جوق.

ينفلياتسيانىڭ ەداۋىر قارقىنى اتىراۋ وبلىسىندا سەزىلدى (ماۋسىمداعى 14,1 پايىزدان شىلدەدە 16,0 پايىزعا دەيىن).

ازىق-تۇلىك باعاسىنىڭ ءوسۋ قارقىنى شىلدەدە 19,7 پايىز ج/ج دەيىن ۇلعايدى (ماۋسىمدا - 19,2 پايىز). وسى توپقا جاتاتىن تاۋارلاردىڭ باعاسى ماڭعىستاۋ وبلىسىندا بارىنشا ءوستى (24,0 پايىز).

ازىق-تۇلىككە جاتپايتىن تاۋارلار باعاسىنىڭ ءوسۋ قارقىنى ج/ج 14,2 پايىزعا دەيىن جەدەلدەدى (ماۋسىمدا - 13,2 پايىز). ەڭ جوعارى ءمان نۇر-سۇلتان قالاسى مەن ۇلىتاۋ وبلىسىندا (18,5 پايىزدان)، ال ەڭ تومەنگى ءمان الماتى قالاسىندا (12,3 پايىز) تىركەلدى.

اقىلى قىزمەت كورسەتۋ باعاسى شىلدەدە ج/ج ءمانىن 9,2 پايىز دەڭگەيىندە ساقتادى، بۇل رەتتە جالپى رەسپۋبليكالىق دەڭگەيدەن باعا ەداۋىر جوعارى بولعان تۇركىستان (11,4 پايىز)، اقتوبە جانە جامبىل وبلىستارىندا (6,7 پايىزدان) ءبىرشاما تومەن ءوستى.

2022 جىلعى شىلدەدە ەلدەگى ايلىق ينفلياتسيا 1,1 پايىزدى قۇرادى، بۇل سوڭعى 5 جىلدا شىلدەدەگى ينفلياتسيانىڭ ورتاشا مانىنەن ەداۋىر جوعارى (2017-2021-جىلدارى: 0,3 پايىز).

بارلىق وڭىردە 2022-جىلعى شىلدەدە باعا ورتاشا تاريحي نورمادان جوعارى ءوستى. ايلىق ينفلياتسيانىڭ اناعۇرلىم قارقىنى اتىراۋ وبلىسىندا بايقالدى (2,1 پايىز).