قاڭتار وقيعاسى: ادامدار ولىمىنە قاتىستى كۇشتىك قۇرىلىمنىڭ 15 قىزمەتكەرى كۇدىككە ءىلىندى
بۇل تۋرالى ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ ايتتى، دەپ حابارلايدى قازاقپارات ءتىلشىسى.
«قۇقىق قورعاۋ قىزمەتكەرلەرىنىڭ رۇقسات ەتىلمەگەن جاۋاپ الۋ ادىستەرىن قولدانۋى سالدارىنان جاپپاي تارتىپسىزدىكتەرگە قاتىسۋعا كۇدىكتى 6 ادام قازا بولعانى تەرگەۋ بارىسىندا انىقتالدى. بۇل فاكتىلەردىڭ بارلىعى ارنايى پروكۋرورلارمەن جان-جاقتى تەرگەلىپ جاتىر، كۇشتىك قۇرىلىمداردىڭ 15 قىزمەتكەرى كۇدىكتى رەتىندە تانىلدى. ولارعا ءتۇرلى بۇلتارتپاۋ شارالارى تاڭدالدى»، - دەدى ە. قيلىمجانوۆ ورتالىق كوممۋنيكاتسيالار قىزمەتىندەگى بريفينگ بارىسىندا.
ونىڭ ايتۋىنشا، تالدىقورعان قالاسىنداعى بلوكپوستاردا جانە اسكەري ءبولىمنىڭ جانىندا، سونداي-اق الماتى قالاسىنداعى الاڭدا جەكەلەگەن ازاماتتار قازا بولدى. ولاردىڭ ولىمىنە ءبىرقاتار اسكەري قىزمەتشىنىڭ ءوز وكىلەتتىكتەرىن اسىرا پايدالانۋى سەبەپ بولعان. كۇدىكتىلەر قىلمىستىق جاۋاپكەرشىلىككە تارتىلۋدا.
«جوعارىدا اتاپ وتكەنىمدەي، بۇل پروتسەستىڭ قيىندىعىن جانە تەرگەۋدىڭ اۋقىمدىلىعىن ەسكەرە وتىرىپ، قالعان ادامداردىڭ قازا بولۋ ءمان-جايلارى جانە ولاردىڭ ولىمىنە كىنالى ادامداردى انىقتاۋ تەرگەپ-تەكسەرۋلەردىڭ اياسىندا بەلگىلى بولادى»، - دەدى ەلدوس قيلىمجانوۆ.