اپتاپ ىستىق، شاڭدى داۋىل، جەل – 15-شىلدەگە ارنالعان اۋا رايى بولجامى

نۇر-سۇلتان. قازاقپارات - سينوپتيكتەر 15-شىلدە، جۇما كۇنى قازاقستان اۋماعىندا اۋا رايى قانداي بولاتىنىن ايتتى، دەپ حابارلايدى قازاقپارات قازگيدرومەتكە سىلتەمە جاساپ.

انتيسيكلون قازاقستاننىڭ وڭتۇستىگى، وڭتۇستىك- شىعىسى، وڭتۇستىك- باتىسى مەن ورتالىعىندا جاۋىن- شاشىنسىز، اشىق اۋا رايىن قالىپتاستىرادى.

ال ەلىمىزدىڭ قالعان تەرريتورياسىندا اتموسفەرالىق فرونتتارعا بايلانىستى نايزاعاي جارقىلداپ، وتكىنشى جاڭبىر جاۋادى، جەل كۇشەيەدى. ەلدىڭ وڭتۇستىك- باتىسىندا، وڭتۇستىگىندە - شاڭدى داۋىل، باتىسىندا - بۇرشاق، سولتۇستىگىندە تۇندە جانە تاڭەرتەڭ تۇمان تۇسەدى.

تۇركىستان، قىزىلوردا، اتىراۋ وبلىستارىنىڭ باسىم بولىگىندە، باتىس قازاقستان وبلىسىنىڭ وڭتۇستىگىندە، جامبىل وبلىسىنىڭ باتىسىندا، وڭتۇستىگىندە توتەنشە ءورت قاۋپى ساقتالادى. كۇندىز اقمولا، سولتۇستىك قازاقستان، الماتى، تۇركىستان، اتىراۋ، اقتوبە، قوستاناي، ۇلىتاۋ، قىزىلوردا وبلىستارىنىڭ باسىم بولىگىندە، باتىس قازاقستان، قاراعاندى وبلىستارىنىڭ وڭتۇستىگىندە قاتتى ىستىق بولادى.

كۇندىز ماڭعىستاۋ وبلىسىنىڭ باسىم بولىگىندە، اتىراۋ، اقتوبە، قوستاناي وبلىستارىنىڭ وڭتۇستىگىندە اپتاپ ىستىق ساقتالادى.