كيىك سانىن رەتتەۋ 15-قىركۇيەكتەن قولعا الىنۋى مۇمكىن
7 شىلدە 18:47

كيىك سانىن رەتتەۋ 15-قىركۇيەكتەن قولعا الىنۋى مۇمكىن

نۇر- سۇلتان. قازاقپارات - قازاقستاندا كيىك سانىن رەتتەۋ 15-قىركۇيەكتەن باستاپ، 30-قاراشا ارالىعىنا دەيىن جۇرگىزىلۋى مۇمكىن. بۇل تۋرالى ەگترم ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى نۇرلان قىلىشبايەۆ ايتتى، دەپ حابارلايدى قازاقپارات ءتىلشىسى.

«زوولوگيا ينستيتۋتى 2022 -جىلعا ارنالعان كيىك سانىن رەتتەۋدىڭ بيولوگيالىق نەگىزدەمەسىن ۇسىندى. عىلىمي قورىتىندىعا سايكەس، كيىكتىڭ ورال پوپۋلياتسياسى سانىنىڭ كۇرت وسۋىنە بايلانىستى ءشوپ پەن سۋ ءۇشىن ءۇي جانۋارلارىمەن باسەكەلەستىكتىڭ ارتۋىنا، كيىكتەردىڭ اۋىل شارۋاشالىعى داقىلدارىنىڭ ەگىستىك القاپتارىنا كىرۋىنە وراي ولاردىڭ ارتىق باسىن رەتتەۋ قاجەتتىگى تۋىنداپ وتىر. مۇنداي جايتتىڭ بەتپاقدالا پوپۋلياتسياسىندا دا بايقالاتىندىعىن اتاپ وتكەن ءجون»، - دەدى ول ەلوردادا وتكەن «كيىك پوپۋلياتسياسى سانىن رەتتەۋ» تاقىرىبىنداعى دوڭگەلەك ۇستەل بارىسىندا.

كوميتەت ءتوراعاسىنىڭ اتاپ وتۋىنشە، بيولوگيالىق نەگىزدەمەگە سايكەس، ۇسىنىلىپ وتىرعان بيىل رەتتەلۋى ءتيىس كيىكتىڭ ورال پوپۋلياتسياسىنىڭ باسى ونىڭ جالپى سانىنىڭ 10 پايىزىنا تەڭ. ونىڭ 5 پايىزى اتالىق كيىك، 47,5 پايىزىن ۇرعاشى كيىك جانە 47,5 پايىزىن بيىلعى ءتولى قۇرايدى.

«ال قوستاناي مەن اقمولا وبلىستارىنىڭ اۋماعىنداعى بەتپاقدالا پوپۋلياسى ءۇشىن 2022 -جىلى ەسەپكە الىنعان ساننىڭ 2,5 پايىزىن اۋلاۋ ۇسىنىلىپ وتىر. ونىڭ 5 پايىزى اتالىق كيىك، 47,5 پايىزىن ۇرعاشى كيىك جانە 47,5 پايىزىن بيىلعى ءتولى قۇرايدى. كيىك سانىن بيولوگيالىق، سونىمەن قاتار ەكونوميكالىق تۇرعىدا رەتتەۋتىڭ وڭتايلى مەرزىمى 15-قىركۇيەكتەن باستاپ 30-قاراشا ارالىعىنا دەيىن»، - دەدى نۇرلان قىلىشبايەۆ.

جاڭالىقتار