15:28, 04 - شىلدە 2022 | GMT +6
رەسەي 15- شىلدەدەن باستاپ شەكاراداعى شەكتەۋلەردى الىپ تاستايدى
ماسكەۋ. تاسس- قازاقپارات - رەسەي 15- شىلدەدەن باستاپ قۇرلىقتاعى شەكارادا 2020 -جىلى كوروناۆيرۋس ينفەكسياسىنا بايلانىستى ەنگىزگەن شەكتەۋلەرىن الىپ تاستاماقشى.
بۇل تۋرالى دۇيسەنبى كۇنى كوۆيدكە قارسى كۇرەس جەدەل شتابى ءمالىم ەتكەن، دەپ حابارلايدى قازاقپارات تاسس- قا سىلتەمە جاساپ.
حابارلامادا ايتىلعانداي، جەدەل شتاب تالقىلاۋ قورىتىندىسى بويىنشا 15- شىلدەدەن باستاپ رەسەيدىڭ مەملەكەتتىك شەكاراسىن كەسىپ وتۋگە سالىنعان ۋاقىتشا تىيىمدى الىپ تاستاۋ جونىندە شەشىم قابىلداعان. بۇعان دەيىن 14- ماۋسىمنان باستاپ ەپيدەميالىق جاعدايدىڭ جاقسارۋىنا بايلانىستى شەتەل ازاماتتارىنىڭ رەسەيگە تەڭىز جانە اۋە بەكەتتەرى ارقىلى كىرۋىنە رۇقسات بەرىلگەن ەدى. ءبىراق جەر بەتىندەگى كولىك تۇرلەرىنىڭ كىرۋىنە شەكتەۋ الىنباعان بولاتىن.
ەسكە سالايىق، رەسەي كوروناۆيرۋس ينفەكسياسىنىڭ تارالۋ قاۋپىنە بايلانىستى 2020 -جىلدىڭ ناۋرىز ايىندا شەكارادان وتۋگە شەكتەۋ قويعان بولاتىن.