وتاندىق عالىم ازىرلەگەن گيدروگەل كومەگىمەن 15 ادامعا وتا جاسالدى

None
None
نۇر-سۇلتان. قازاقپارات - قازاقستاندىق عالىمدار ازىرلەگەن بىرەگەي فيبريندى گيدروگەلدى قولدانۋ ارقىلى 15 ادامعا تىزە بۋىنىنىڭ شەمىرشەگىن قالپىنا كەلتىرۋ وپەراتسياسى جاسالدى، دەپ حابارلايدى قازاقپارات ق ر ءبىلىم جانە عىلىم مينيسترلىگىنە سىلتەمە جاساپ.

«ءۇش اي ىشىندە فيبريندى گيدروگەلدىڭ كلينيكالىق سىناقتارى اياسىندا 15 ەرىكتىگە وتا جاسادىق. پاتسيەنتتەردىڭ كوپشىلىگى - بۋىندارىندا جاسىنا بايلانىستى وزگەرىستەرى بار ادامدار. وپەراتسيا 15 مينۋتتان 25 مينۋتقا دەيىن سوزىلادى. سونداي-اق، بارلىق وپەراتسيا شتاتتىق رەجيمدە جاسالدى. ناۋقاستاردىڭ ساۋىعۋ كەزەڭى التى ايعا سوزىلادى، ءبىراق ەگدە جاستاعى ناۋقاستار ءۇشىن قالىپقا كەلۋ ۋاقىتى ۇزاعىراق بولۋى مۇمكىن. وسى كەزەڭ وتكەننەن كەيىن العاشقى ناتيجەلەردى جاريالاي الامىز»، - دەدى قازاقستاندىق عالىم، ۇلتتىق بيوتەحنولوگيالىق ورتالىقتىڭ جاسۋشالارى زەرتحاناسىنىڭ مەڭگەرۋشىسى ۆياچەسلاۆ وگاي .

عالىمداردىڭ ايتۋىنشا، ۇقساس دياگنوزدارمەن ەمدەۋدىڭ بىرنەشە ءادىسى بار، ءبىراق گيدروگەلدى قولدانۋ - زاقىمدانعان بۋىندار مەن شەمىرشەكتى تولىعىمەن قالپىنا كەلتىرۋگە مۇمكىندىك بەرەتىن جالعىز ءادىس.

ول ق ر ب ع م عىلىمدى ماقساتتى قارجىلاندىرۋدىڭ 2021-2022-جىلدارعا ارنالعان باعدارلاماسى اياسىندا ازىرلەنگەن. جوباعا ۇلى بريتانيا ەلشىلىگى قىزىعۋشىلىق تانىتىپ وتىر.

كلينيكالىق سىناقتار اكادەميك ن. باتپەنوۆ اتىنداعى تراۆماتولوگيا جانە ورتوپەديا ۇلتتىق عىلىمي ورتالىعىندا ناۋرىز ايىندا باستالدى.

زەرتتەۋدىڭ العاشقى ەكى كەزەڭى وسى جىلدىڭ سوڭىنا دەيىن جالعاسادى. كەيىن بىرنەشە ورتالىقتا كلينيكالىق سىناقتار وتكىزىلەدى. ناتيجەسىندە بيومەديتسينالىق پرەپارات تىركەلىپ، ونى جاپپاي ءوندىرۋ جانە قولدانۋعا مۇمكىندىك پايدا بولادى دەگەن جوسپار بار.

پروتسەدۋرا اقىلى دا، كۆوتا بويىنشا تەگىن دە جاسالماق.

سوڭعى جاڭالىقتار