+7 (701) 759 90 19
USD 436.29 EUR 492.83
RUB 5.92 CNY 68.48
جاڭالىقتار

الامان مارافون: 15 جەلاياق نۇر-سۇلتاننان ورالعا جولعا شىقتى - فوتو

26 قاراشا 13:45
:ءبولىسۋ
الامان مارافون: 15 جەلاياق نۇر-سۇلتاننان ورالعا جولعا شىقتى - فوتو

نۇر-سۇلتان. قازاقپارات - تاۋەلسىزدىڭ 30 جىلدىعىنا ارنالعان الامان مارافونعا قاتىساتىن 15 تاجىريبەلى جەلاياقتى ەلوردا تۇرعىندارى ءسات ساپار تىلەپ، شىعارىپ سالدى.

سيمۆوليكالىق مانگە يە 2021 شاقىرىم جولدى مارافونشىلار 8 كۇندە جۇگىرىپ وتپەكشى، دەپ حابارلايدى قازاقپارات ءتىلشىسى.

قىستىڭ كوزى قىراۋدا ەكى مىڭ شاقىرىمنان استام قاشىقتىقتى جولسىزبەن جۇگىرىپ وتۋگە بەكىنگەن تاۋەكەلشىل توپتى شىعارىپ سالۋ ءۇشىن ەلوردا تۇرعىندارى شىڭىلتىر ايازعا قاراماستان كوپ جينالدى. مەملەكەتتىك رامىزدەر الاڭىنداعى شارا كىشىگىرىم مەرەكەلىك كونسەرتكە ۇلاسىپ، رۋحتى سوزدەر مەن اق باتالار ايتىلدى.


مارافونشىلارعا اق جول تىلەي كەلگەندەردىڭ اراسىندا وليمپيادا چەميپونى سەرىك ساپيەۆ تە بولدى.

«وسى شاراعا باستاماشى بولعان قازاقستان قۇرىلىسشىلار وداعىنىڭ باسشىسى تالعات ەرعاليەۆكە العىس ايتقىم كەلەدى. بۇل اراعا سالاماتتى ءومىر سالتىن ۇستاناتىن وتانداستارىمىز جينالىپ وتىر. تەك ۇستانىپ قانا قويماي، بۇگىنگى ارەكەتتەرىمەن ناسيحاتتاپ جاتىر دەسەك تە بولادى. سپورتشى رەتىندە دەنە شىنىقتىرىپ، سپورتپەن شۇعىلداناتىن ادامداردىڭ قاتارى كوبەيىپ جاتقانىن كورۋ جانعا جاعىمدى. مەملەكەت باسشىسىنىڭ بۇقارالىق سپورتتى دامىتۋعا باسا كوڭىل ءبولۋدى تاپسىرعانىن ءبارىمىز بىلەمىز. بۇگىنگى شارا دا سول ۇستانىممەن ۇندەسەدى. بۇقارالىق سپورت دامىعاندا عانا ارامىزدان چەميپوندار كوپتەپ شىعادى. ءوزىم بۇل مارافونعا قاتىسپاسام دا، قولداۋ ءبىلدىرۋ ءۇشىن كەلىپ تۇرمىن»، - دەدى بوكسشى.


ۇيىمداستىرۋشىلاردىڭ ايتۋىنا قاراعاندا، تاۋەلسىزدىكتىڭ 30 جىلدىعىنا ارنالعان شاراعا ق ر پرەزيدەنتى اكىمشىلىگى، Nur Otan پارتياسى، اقپارات جانە قوعامدىق دامۋ، ىشكى ىستەر، مادەنيەت جانە سپورت مينيسترلىكتەرى، ەلوردا اكىمدىگى قولداۋ ءبىلدىرىپ وتىر.

ال Stroiklass قۇرىلىس كومپانياسى الامان مارافونعا دەمەۋشى رەتىندە اتسالىسۋدا. مارافونشىلارعا جينالعان قاۋىم اتىنان ق ر پارلامەنتى ءماجىلىسى حالىقارالىق قاتىناستار، قورعانىس جانە قاۋىپسىزدىك كوميتەتىنىڭ مۇشەسى اباي تاسبولاتوۆ لەبىز ارنادى.

«وسىنداي كەڭ بايتاق جەردى كەشەگى بابالارىمىز كۇشى مەن رۋحى بيىك بولعاندىقتان، مىقتى مىنەزبەن قورعاي العان. بۇگىنگى مارافونعا قاتىسۋشىلاردىڭ اراسىندا 62 جاستاعى ازامات تا بار. باتىر بابالاردان قالعان رۋحتىڭ ارقاسىندا مىناداي ايازدا 2000 شاقىرىمدى كۇن، ءتۇن دەمەي جۇگىرىپ وتۋگە بەكىنىپ وتىر. قاۋىپسىزدىك شارتىنا قايشى بولعاندىقتان اسفالت جولمەن جۇگىرۋگە رۇقسات بەرىلگەن جوق. سوندىقتان باتىرلار ورالعا دەيىن اۋىل- اۋىلدىڭ اراسىمەن جۇگىرىپ جەتپەكشى. كەي ادامدار كولىكپەن قاتىناۋدى قيىن كورەتىن شالعايعا بۇلاردىڭ جاياۋ اتتانعالى وتىرعانىن باتىرلىق دەپ ەسەپتەۋ كەرەك»، - دەدى ول.


بۇگىن ەلوردادان شىققان مارافونشىلار كوكشەتاۋ، پەتروپاۆل، قوستاناي، اقتوبە قالالارىن باسىپ ءوتىپ، ورالعا 8 كۇندە جەتەمىز دەپ وتىر.

ۇراندارى - «اياڭمەن دە، كولىكپەن دە 1 شاقىرىم دا جۇرمەيمىز».

ۇيىمداستىرۋشىلاردىڭ ايتۋىنشا، الامان مارافوننىڭ مارشرۋتىندا تابيعي كەدەرگىلەر مەن قيىن اسۋلار دا كەزدەسەدى. مۇنى ولار تاۋەلسىزدىكتىڭ 30 جىلىنداعى تاۋەكەلدەر مەن قاتەرلەردىڭ سيمۆولى رەتىندە تاڭداعان ەكەن. 15 جەلاياقتىڭ ىشىندە مەملەكەتتىك قىزمەتشىلەر دە بار بولىپ شىقتى. 62 جاستاعى تالاپنۇر بايزاق سالاماتتى ءومىر سالتىن ۇستانىپ كەلە جاتقانىنا 40 جىلدان اسقانىن ايتادى.

«بۇعان دەيىن ەلوردادان الماتىعا دەيىن 1270 شاقىرىمدى قىستىگۇنى جۇگىرىپ وتكەن بولاتىنمىن. بۇل جولعى مارافون ۇزاقتىعى بويىنشا ودان اسىپ كەتەيىن دەپ تۇر. مارافونشى ۇنەمى بابىندا بولۋى كەرەك. كۇندە تاڭعى ساعات 6.00-7.30 عا دەيىن جۇگىرىپ، شىنىعامىن. جىلدىڭ ءتورت مەزگىلىندە دە جۇگىرۋدى توقتاتپاعاندىقتان، مۇنداي اۋا رايىندا مارافونعا قاتىسۋ تاڭسىق دەۋگە كەلمەيدى. ءوزىم ق ر اۋىل شارۋاشىلىعى مينيسترلىگىندە جۇمىس ىستەيمىن. Stroiklass كومپانياسىنىڭ سپورتقا اۋەس جىگىتتەرىمەن بىرگە جۇگىرەتىن ەدىك. مارافون تۋرالى سولاردان ەستىپ، قاتىسۋعا بەل بايلادىم»، - دەيدى تالاپنۇر بايزاق.


مارافون مارشرۋتىنا كىرگەن ەلدى مەكەندەر مارافونشىلاردىڭ الدىنان شىعىپ، قۇرمەت كورسەتىلەدى دەپ كۇتىلۋدە.



:ءبولىسۋ
پئكئر قالدئرؤ
+7
جئبةرؤ
سونداي-اق... وقىڭىز
ونلاين قىزمەتكەرلەر

مۇراعات