ەلوردادا سۋسىن بوتەلكەلەرىن قابىلدايتىن 15 فاندومات ورناتىلادى
پلاستيكتى وڭدەۋدەن الىنعان شيكىزاتتى بولاشاقتا جاڭا قاپتاما وندىرىسىندە قولدانۋعا بولادى. شاراعا ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ارنايى قاتىستى.
«بۇگىن ەلوردا تاريحىنداعى ماڭىزدى كۇن دەپ ويلايمىن، 5- ماۋسىم - «دۇنيەجۇزىلىك قورشاعان ورتانى قورعاۋ كۇنى» وتەدى، سونىڭ قارساڭىندا ەلوردادا بوتەلكەلەر قابىلدايتىن ءبىرىنشى اپپارات قويىلدى. ءوز كەزەگىندە ءبىزدىڭ مينيسترلىك وسىنداي فاندوماتتار ورناتۋعا كومەك پەن قولداۋ كورسەتۋگە دايىن»، - دەدى ەكولوگيا ءمينيسترى.
اپپاراتتى ورناتۋ تۋرالى باستاماعا «Galmart» سۋپەرماركەتى قولداۋ كورسەتكەن.
«بۇل شارانىڭ دۇنيەجۇزىلىك قورشاعان ورتانى قورعاۋ كۇنى قارساڭىندا وتكەنىنە وتە قۋانىشتىمىز. مۇنداي فاندوماتتاردىڭ بولاشاعى زور دەپ ويلايمىن. ەندى تابيعاتتى لاستاماۋعا، پلاستيك جيناۋعا مۇمكىندىك بار. فاندوماتتار تۇرعىندار اراسىندا تانىمال بولاتىنىنا ۇمىتتەنەمىز. ءبىز تابيعاتقا قامقورلىق جاسايمىز جانە قورشاعان ورتانى تازا ۇستاۋ ءۇشىن قولدان كەلگەننىڭ ءبارىن جاسايمىز»، - دەيدى Galmart جەلىلەرىنىڭ باس ديرەكتورى مادينا شاحبۋتوۆا.
اپپارات كولەمى 0,5 تەن 2 ليترگە دەيىنگى پلاستيك بوتەلكەلەردى، اليۋميني بانكالاردى شتريح- كودىمەن قابىلدايدى. ولاردىڭ ىشىندە سۇيىقتىق بولماۋى ءتيىس. الدىمەن قولايلى بوتەلكەنىڭ نەمەسە بانكانىڭ شتريح-كودىن كورسەتۋ كەرەك. بوتەلكە كورسەتىلگەن ولشەمدەرگە سايكەس كەلسە، اپپارات ونى قابىلدايدى. بىرنەشە بوتەلكە نەمەسە بانكا تاپسىرعىڭىز كەلسە دە، ولاردى كەزەك-كەزەك سالۋ كەرەك.
«بۇل رەسەيلىك كومپانيانىڭ ازىرلەمەسى. ازىرگە اپپارات الماتى مەن نۇر-سۇلتانداعى ەكى ساۋدا-ويىن-ساۋىق ورتالىعىندا ورناتىلدى. اي سوڭىنا دەيىن «كەرۋەن City» ، «Talan Towers» ساۋدا ورتالىقتارى مەن Galmart سۋپەرماركەتتەر جەلىلەرىنە فاندوماتتار ورناتۋدى جوسپارلاپ وتىرمىز. بارلىعى 15 فاندومات ورناتىلادى»، - دەدى ecoplatform كومپانياسىنىڭ ديرەكتورى ادىلەت نۇرسەلينوۆ.
حالىقتى ىنتالاندىرۋ ماقساتىندا پلاستيكالىق بوتەلكەلەردى تاپسىراتىن تۇرعىندارعا بونۋستار بەرىلەدى. بونۋستى تەلەفون ءنومىرى نەمەسە بانك كارتاسىن تىركەۋ ارقىلى جيناۋعا بولادى.
«ياعني، Galmart كليەنتى سۋپەرماركەتتىڭ موبيلدى قوسىمشاسىن جۇكتەيدى، اۆتوريزاتسيا جاسايدى جانە بەلگىلى ءبىر دەربەس شوت اشادى، وعان ساۋدا-ويىن-ساۋىق ورتالىعى اۋماعىندا جۇمساۋعا بولاتىن بونۋستار جيناقتالادى. سونداي-اق Kaspi-مەن دە كەلىسسوزدەر جۇرگىزىپ جاتىرمىز. كەلىسسوزدەر ءساتتى وتسە، حالىق ەكولوگيالىق جوباعا كوبىرەك قىزىعۋشىلىق تانىتار ەدى»، - دەيدى ادىلەت نۇرسەلينوۆ.
