جۇمىسپەن قامتۋدىڭ جول كارتاسى: ەلوردادا 15 مىڭنان استام ادام ەڭبەكپەن قامتىلدى
ونىڭ ىشىندە 7910 ادام - حالىقتى جۇمىسپەن قامتۋ ورتالىعى ارقىلى ەكى قولعا ءبىر كۇرەك تاپقاندار، دەپ حابارلايدى قازاقپارات.
«جول كارتاسىمەن جۇمىسقا ورنالاسقاندار: قۇرىلىسشى، سانتەحنيك، دانەكەرلەۋشى، كلينينگتىك قىزمەت كورسەتۋشىلەر، اۋىر جۇك كولىكتەرى مەن كران جۇرگىزۋشىلەرى، جول جوندەۋشى، اسپاز، ەسەپشى، بەتونشى، تەحنيكالىق ساتىپ الۋلار بويىنشا مامان، ينجەنەر، ەلەكتر مامانى. باعدارلاما اياسىندا مەكتەپتەر، اۋرۋحانالار، قۇرىلىسى توقتاپ تۇرعان كوپ قاباتتى تۇرعىن ۇيلەر جوندەلىپ، ينجەنەرلىك- كولىك ينفراقۇرىلىمدارعا كۇردەلى ورتاشا جانە اعىمداعى جوندەۋ جۇمىستارى جۇرگىزىلدى. سونداي- اق، كوگالداندىرۋ اباتتاندىرۋ بويىنشا قۇرىلىس سالاسىنا قاتىستى بوس جۇمىس ورىندارى ۇسىنىلادى»، - دەيدى جۇمىسپەن قامتۋ ورتالىعى.
بيىل ەلوردادا 151 ينفراقۇرىلىمدىق جوبا جۇزەگە اسىرۋ جوسپارلانعان. قازىرگى تاڭدا 45 جوبا بويىنشا جۇمىس اياقتالدى. وسى جوبالاردى جۇزەگە اسىرعان مەردىگەر مەكەمەلەردە 1469 ادام تۇراقتى جۇمىسقا ورنالاستى.
«نۇر- سۇلتان قالاسى جۇمىسپەن قامتۋدىڭ جول كارتاسى باعدارلاماسىن جۇزەگە اسىرۋدا بيىل جوعارى ناتيجە كورسەتتى. بۇل تۋرالى «اتامەكەن» ۇلتتىق كاسىپكەرلەر پالاتاسىنىڭ VII سەزىندە ايتىلدى. سونداي- اق، جۇمىسپەن قامتۋدىڭ جول كارتاسى باعدارلاماسىنىڭ كەلەسى جىلعا ارنالعان جوباسى 1 جەلتوقسانعا دەيىن ازىرلەنۋى ءتيىس. ونى ۇلتتىق بانك پەن ۇكىمەت بىرلەسە جۇزەگە اسىرادى»، - دەپ اتاپ ءوتتى جۇمىسپەن قامتۋ ورتالىعى.
جۇمىسپەن قامتۋدىڭ جول كارتاسى باعدارلاماسىنا قاتىسۋشىلار 85000-250000 تەڭگە كولەمىنە جالاقى الادى. ول جۇمىسكەردىڭ قىزمەتى مەن اتقارعان جۇمىسىنا قاراي بەكىتىلەدى.
جول كارتاسى بويىنشا بوس جۇمىس ورىندارى تۋرالى مالىمەتتەر enbek.kz پورتالىندا جاريالانادى. حالىقتى جۇمىسپەن قامتۋ ورتالىعى بەيبىتشىلىك كوشەسى،25 مەكەنجايىندا ورنالاسقان.
«جۇمىسپەن قامتۋدىڭ جول كارتاسى» تۋرالى مالىمەتتى 77172578937, 578889، 248302، 8 7771168273 نومىرىنە حابارلاسىپ بىلۋگە بولادى.
