كوممۋنالدىق قىزمەتتەرگە 15 مىڭ تەڭگە: جالدامالى پاتەردە تۇراتىندارعا جەڭىلدىك قاراستىرىلماعان
بۇل تۋرالى الماتى قالاسى ەنەرگوتيىمدىلىك جانە ينفراقۇرىلىمدىق دامۋ باسقارماسىنىڭ باسشىسى اسەت ماسابايەۆ ايتتى، دەپ حابارلايدى قازاقپارات ءتىلشىسى.
ونىڭ سوزىنە قاراعاندا، يندۋستريا جانە ينفراقۇرىلىمدىق دامۋ مينيسترلىگى كارانتين كەزىندە كوممۋنالدىق شىعىنداردى وتەۋ ەرەجەسىنە ەنگىزگەن وزگەرىستەردە جالدامالى پاتەردە تۇراتىندارعا جەڭىلدىك بەرىلمەگەن.
«ءبىز ءوز تارپىمىزدان مينيسترلىكتەن جالدامالى پاتەردە تۇراتىنداردى دا ەنگىزۋ تۋرالى ۇسىنىس بەردىك. ياعني، ول بىزگە باسپانانى جالداپ تۇرىپ جاتقانىن راستايتىن كەلىسىمشارتتى كورسەتسە، ءبىز تولەپ بەرگىمىز كەلگەن. وكىنىشكە وراي، مينيسترلىك ۇسىنىسىمىزدى قۇپتامادى»، - دەيدى اسەت ماسابايەۆ.
ايتا كەتەيىك، مەملەكەت باسشىسىنىڭ تاپسىرماسىن ورىنداۋ ماقساتىندا اعىمداعى جىلدىڭ 9 - مامىرىندا كارانتين رەجيمى كەزەڭىندە كوممۋنالدىق قىزمەتتەردى جەتكىزۋشىلەردىڭ شىعىندارىن وتەۋ ەرەجەسىنە وزگەرىستەر مەن تولىقتىرۋلار ەنگىزىلدى.