بۇگىن قارجىگەرلەر مەرەكەسى: 15-قاراشا - تەڭگەنىڭ اينالىمعا ەنگەن كۇنى

نۇر-سۇلتان. قازاقپارات - بۇگىن ۇلتتىق ۆاليۋتا - تەڭگەنىڭ اينالىمعا ەنگەن كۇنى جانە قازاقستان قارجىگەرلەرىنىڭ كاسىپتىك مەرەكەسى، دەپ حابارلايدى قازاقپارات.

ۇلتتىق ۆاليۋتانى تەڭگە دەپ اتاۋدى ۇسىنعان حالىقارالىق ينجەنەرلەر اكادەمياسىنىڭ اكادەميگى، قازاقستاننىڭ بەلگىلى عالىمى، ك س ر و مەملەكەتتىك سىيلىعىنىڭ لاۋرەاتى، «قۇرمەت» وردەنىنىڭ يەگەرى ساۋىق تاكەجانوۆ ەدى.

1992-جىلدىڭ 27- تامىزى كۇنى ۇلتتىق بانك تەڭگە كۋپيۋراسىنىڭ ۇلگىلەرىن بەكىتتى. سودان كەيىن قازاق ۆاليۋتاسىن ومىرگە كەلتىرگەن سۋرەتشىلەر تيمۋر سۇلەيمەنوۆ، مەڭدىباي الين، اعىمسالى دۇزەلحانوۆ، قايروللا ابجالەلوۆتەر انگلياعا اتتاندى.

تەڭگە ۇلى بريتانيادا باسىلىپ شىقتى. ەڭ العاشقى تەڭگەمىزدە بەلگىلى تاريحي تۇلعالاردىڭ پورترەتتەرى، الاتاۋ مەن كوكشەتاۋ كورىنىستەرى، قوجا احمەت ياساۋي كەسەنەسىنىڭ بەينەسى، ماڭعىستاۋدان تابىلعان تاستاعى تاڭبالار پايدالانىلدى. ءبىر تەڭگەلىك بانكنوتقا ءابۋ ناسىر ءال-فارابي، ءۇش تەڭگەلىكتە ءسۇيىنباي، بەس تەڭگەلىكتە قۇرمانعازى، ون تەڭگەلىكتە شوقان، جيىرما تەڭگەلىكتە اباي، ەلۋ تەڭگەلىكتە ءابىلقايىر حان، ءجۇز تەڭگەلىكتە ابىلاي حان بەينەسى سومدالدى.

1993-جىلدىڭ 12- قاراشاسىندا ەلباسى نۇرسۇلتان نازاربايەۆ «قازاقستان رەسپۋبليكاسىندا ۇلتتىق ۆاليۋتا ەنگىزۋ تۋرالى» جارلىققا قول قويدى. ال 15- قاراشادا تاۋەلسىز قازاقستان رەسپۋبليكاسىنىڭ ءتول ۆاليۋتاسى اينالىمعا ەندى. ەسكى اقشانى قازاقستاندىق تەڭگەگە ايىرباستاۋ 1993-جىلى 15- قاراشادا ساعات 8.00 دە باستالىپ، 20 قاراشادا ساعات 20.00 دە اياقتالدى.

ۇلتتىق بانك باستاپقىدا 1 تەڭگەنى سول كەزدەگى مىڭ رۋبلگە باعالاعان بولاتىن. دەگەنمەن، ەلىمىزدىڭ ساياسي، الەۋمەتتىك ماسەلەلەرى جانە مەملەكەتارالىق قاتىناستار ەسكەرىلىپ 1 تەڭگە 500 سومعا بەكىتىلدى.

تەڭگە ءبىرىنشى اينالىمعا كىرگەن كۇنى 1 دوللار 4,75 تەڭگە بولىپ بەكىتىلدى. 1994-جىلى قاعاز تيىنداردىڭ ورنىنا جەزدەن جاسالىنعان 2,5,10, 20 جانە 50 نومينالدى مونەتالار شىقتى. ۇلتتىق ۆاليۋتا بانكنوت جانە مونەتا تۇرىندە اينالىسقا ەنگىزىلدى. قازىر بانكنوت - ۇلتتىق بانكتىڭ الماتى قالاسىنداعى بانكنوت فابريكاسىندا، ال مونەتا - وسكەمەندەگى مونەتا سارايىندا شىعارىلادى.

مەملەكەت باسشىسىنىڭ جارلىعىمەن 1997-جىلدان بەرى 15- قاراشا ءتول ۆاليۋتامىزدىڭ تۋعان كۇنى ءارى ق ر قارجى سالاسى قىزمەتكەرلەرىنىڭ كۇنى بولىپ بەلگىلەندى.

كەشە ق ر ۇلتتىق بانكى وكىلدەرى تەڭگەنىڭ نەگە نىعايماعانىن تۇسىندىرگەن ەدى.