شەكاراعا شابۋىل جاساعان 15 سودىردىڭ كوزى جويىلدى

نۇر-سۇلتان. قازاقپارات - تاجىكستاننىڭ شەكارالىق اسكەر باسقارماسى 6- قاراشاعا قاراعان ءتۇنى تاجىك-وزبەك شەكاراسىنا قارۋلى توپتىڭ شابۋىل جاساپ، ءبىر ميليتسيا قىزمەتكەرى جانە ءبىر شەكاراشى قازا تاپقانىن حابارلادى.

«6- قاراشاعا قاراعان ءتۇنى ساعات 3:23 تە ماسكا كيگەن 20 شاقتى ادامنان قۇرالعان قارۋلى توپ «سۋلتاناباد» شەكارالىق وتريادى باقىلاۋىنداعى 4№ «يشكيبود» شەكارالىق زاستاۆاسىن اتقىلاپ، شابۋىل جاسادى. شابۋىل كەزىندە ولار بەس قارۋ-جاراقتى تارتىپ الدى. كۇشتىك قۇرىلىمداردىڭ وپەراتسياسى ناتيجەسىندە قارۋلى توپ قورشاۋعا الىنىپ، 15 مۇشەسىنىڭ كوزى جويىلدى، بەسەۋى ۇستالدى» دەلىنگەن باسقارما حابارلاماسىندا.

شەكارالىق اسكەر باسقارماسىنىڭ باسپا ءسوز قىزمەتى شۇعىل-تەرگەۋ توبى قۇرىلىپ، تەرگەۋ جالعاسىپ جاتقانىن حابارلادى. ولاردىڭ ايتۋىنشا، قارۋلى توپ مىنگەن ءتورت كولىك تە جانىپ كەتكەن.

ازاتتىقتىڭ تاجىك قىزمەتىن اسكەريلەر وقيعا ورنىنا جىبەرمەدى. مەملەكەتتىك اقپارات اگەنتتىكتەرى جاريالاعان سۋرەتتەردەن ولگەن ادامداردىڭ قارا ءتۇستى كيىم كيگەنى كورىنەدى.

بيلىك شابۋىلداۋشىلار تۋرالى تولىق دەرەك تاراتپادى. قازا تاپقان شەكاراشى مەن ىشكى ىستەر مينيسترلىگىنىڭ وكىلىنىڭ دە اتى-ءجونىن ازىرگە ايتپادى.

ازاتتىقتىڭ تاجىك قىزمەتىنىڭ حابارلاۋىنشا، بۇل وقيعادان كەيىن جولدار جابىلىپ، دۋشانبە مەن وعان جاقىن جاتقان ەلدى مەكەندەردە قاۋىپسىزدىك شارالارى كۇشەيگەن. بەكەتتەن وتكەن كولىكتەر تەكسەرىلىپ جاتىر.

«ازاتتىق»