استانادا جىل باسىنان بەرى 15 ادام اشىق قۇدىققا ءتۇسىپ كەتكەن

 استانا. قازاقپارات - استانادا جىل باسىنان بەرى 15 ادام كارىز قۇدىعىنا ءتۇسىپ كەتكەن. ءماجىلىس دەپۋتاتى سەرگەي سيمونوۆ كارىز قۇدىقتارىنىڭ قاقپالارىنىڭ ۇرلانۋىن ۆارۆارلىق ەكەنىن ايتىپ، بۇل پروبلەمانىڭ 2000-جىلداردىڭ باسىندا قالاي شەشىلگەنىن ايتىپ بەردى.

«2000-جىلداردىڭ باسىندا كارىز قۇدىقتارىنىڭ قاقپالارى، تەلەكوممۋنيكاتسيالىق سىمدار، سۋ قۇبىرلارى جاپپاي ۇرلاناتىن. سول كەزدە ۇكىمەتتەگىلەر ءتۇرلى-ءتۇستى جانە قارا مەتالداردى وتكىزۋدى زاڭ دەڭگەيىندە رەتتەي الاتىن شارالار قابىلدادى. ناتيجەسىندە ونداي جاعدايلار ءبىرلى جارىم بولدى. الايدا 20 جىل وتكەن سوڭ مۇنداي ۇرلىقتار قايتا جاسالا باستادى، سالدارىنان قايعىلى جاعدايلار بولىپ جاتىر»، - دەدى دەپۋتات پرەمەر-مينيسترگە قويعان ساۋالىندا. «استانادا 2018 -جىلى قاقپاقسىز جاتقان ليۋكتەر جايلى 2800 ءوتىنىش كەلىپ تۇسكەن. 21 ادام قۇدىققا ءتۇسىپ كەتكەن، 1 ادام قازا بولدى. ال 2019 -جىلدىڭ ەكى ايىنىڭ وزىندە 500 شاعىم ءتۇستى، 15 ادام قۇلاپ كەتتى جانە ناتيجەسىندە ءبىر ادام قازا بولدى»، - دەدى سيمونوۆ.

ونىڭ ايتۋىنشا، مەتال قابىلداۋ جانە وتكىزۋ ورىندارىنىڭ قىزمەتى رەتتەلمەگەن.

Kaz.tengrinews.kz