وتباسى باقىتىنا جەتەلەيتىن 15 ەرەجە

None
None
 استانا. قازاقپارات - ارينە، وتباسى باقىتى ەرلى-زايىپتىنىڭ ەكەۋىنە دە بايلانىستى، دەگەنمەن «جاقسى ايەل - كۇيەۋىن ورگە سۇيرەيدى، جامان ايەل - كورگە سۇيرەيدى» دەگەن ءسوز بەكەر ەمەس...

1. «راقمەت» ايتىڭىز

ادەتكە اينالعان قاراپايىم ريزاشىلىق ءبىلدىرۋ، وتباسىن جاعىمدا اۋا-رايىنا بولەيدى. كۇيەۋىڭىز ءسىز ايتپاساڭىز دا ءۇيدى جيناپ قويدى ما؟ ءسىزدىڭ تابىستى جۇمىس ىستەپ جۇرگەنىڭىزدى بايقادى ما؟ شىنايى ريزاشىلىعىڭىزدى، جانىڭىزدا زەيىندى ادام جۇرگەنىنە قۋانىشىڭىزدى ءبىلدىرىڭىز.

2. نەنى ۇناتاتىنىڭىزدى ايتىڭىز

ارينە، كۇندەلىكتى «مەن سەنى سۇيەمىن» دەگەن سوزدەر شىنايى ومىردەن گورى، مەلودرامالاردا ءجيى ايتىلادى. ءبىراق كۇيەۋىڭىز سىزدەن كۇندەلىكتى جاقسى ءسوز ەستىپ جۇرگەنىنە كوز جەتكىزىڭىز. ونىڭ ارتىقشىلىقتارى مەن ءىس-ارەكەتتەرىنە قوشامەت پەن قولداۋ ءبىلدىرىڭىز، جاي عانا: «سەن سونداي كەرەمەت ادامسىڭ!» دەگەننىڭ ءوزى نە تۇرادى؟!

3. كۇيەۋىڭىز ءۇشىن كيىنىڭىز

ءبىز كوبىنە قوناققا بارعاندا نەمەسە قۇربىلارىمىزبەن كەزدەسۋگە بارعاندا بويانىپ-سىلاناتىنىمىز بار. ءبىراق ءبىز ەڭ الدىمەن كۇيەۋىمىز ءۇشىن ساندەنۋدى ادەتكە اينالدىرۋىمىز كەرەك. ول قاي كويلەگىڭىزدى ۇناتاتىنىن ءبىلىپ الىڭىز، ونىمەن اقىلداسپاي شاش ۇلگىڭىزدى كۇرت وزگەرتىپ تاستاماڭىز، ال جەكسەنبىلىك قىدىرىستارعا ىڭعايلى دجينسى ەمەس، ادەمى بەلدەمشەنى تاڭداڭىز.

4. ونىڭ جاعىندا بولىڭىز

ەسىڭىزدە بولسىن: سىزدەر ءبىر كەزدەرى ورتاق شارۋاشىلىقتى جۇرگىزۋگە شەشىم قابىلداعان ەرەسەك ادامدار ەمەسسىزدەر، سىزدەر -  ءبىر كومانداسىزدار. ال جاقىن ادامدار ءاردايىم ءبىر- ءبىرىن قولداۋعا اسىعادى. سوندىقتان بارلىق جاعدايدا كۇيەۋىڭىزدىڭ جاعىندا بولىڭىز -  ءتۇرلى داۋ- جانجالداردا، جۇمىستاعى كەلەڭسىزدىكتەردە. بۇل ونىڭ جەكە پسيحوتەراپيەۆتى بولۋ دەگەندى بىلدىرمەيدى، ءبىراق كۇيەۋىڭىز نە بولسا دا ءسىز ونى قولدايتىنىنا سەنىمدى بولۋى كەرەك. جانە، تۋعان- تۋىس، دوس- جاران مەن ارىپتەستەرىنىڭ كوزىنشە وعان ەسكەرتۋ ايتپاڭىز. تەك وڭاشادا جانە ونىڭ سەزىمىنە قاياۋ ءتۇسىرىپ الماي ايتقانىڭىز ءجون.

5. «تاماشا يدەيا» دەگەن ءسوزدى جاتتاپ الىڭىز

كوپتەگەن وتباسىلاردا ۇرىس-كەرىس ايەلى كۇيەۋىن تىم قيالي سانايتىنىنان، ءۇي جاعدايىن ويلاۋدىڭ ورنىنا ءوز ارمانىن ىسكە اسىرۋعا اسىعاتىن جاۋاپسىز دەپ ويلايتىنىنان شىعادى. كۇيەۋىڭىزدىڭ تاعى ءبىر يدەياسى اسا جاعىمدى بولماسا دا، «بوس ساندىراق» دەۋگە اسىقپاڭىز. ءبىر ساتكە كىدىرىس جاساپ، ۇشكە دەيىن ساناڭىز دا: «قىزىق يدەيا ەكەن» دەڭىز. كۇيەۋىڭىز دە بىردەڭەنى قالاۋعا، سوعان قول جەتكىزۋگە جانە ارمانىن ىسكە اسىرۋىنا قۇقىعى بار.

6. ونىمەن ءبىر ادام بولۋعا تىرىسپاڭىز

ەرلى-زايىپتىلاردىڭ ءارقايسىنىڭ ءوز جەكە كەڭىستىك شەكاراسى بولعان ءجون. سوندىقتان ءوز قىزىعۋشىلىقتارىڭىز بەن اۋەسقويلىعىڭىز بولعانى ءجون جانە ەگەر ەكىنشى جارتىڭىز بۇعان قانداي دا ءبىر سەبەپتەرمەن ورتاقتاسا الماسا نەمەسە كەيدە وزىمەن- ءوزى بولعاندى قالاسا تۇسىنىستىكپەن قاراڭىز. ەگەر ەكەۋىڭىز دە ءبىر- ءبىرىڭىزدىڭ قاجەتتىلىكتەرىڭىزدى سىيلاي الساڭىزدار، بۇل وتباسىن بەرىك ەتەدى.

7. جاقسى وتاناسى بولىڭىز

ءۇي تىرلىگىن مىندەتسىمەي، تاۋ قوپارىپ جاتقانداي جاساماڭىز. تۇرمىستى وڭتايلاندىرۋدىڭ زاماناۋي ادىستەرىن قاراستىرىڭىز. ارتىق زاتتار مەن قاجەت ەمەس زاتتاردى شىعارىپ، كەڭىستىكتى ۇتىمدى ۇيلەستىرۋ، ءمازىر جوسپارلاۋ -  مۇنىڭ ءبارى ءۇيدىڭ بەرەكەسىن كەلتىرىپ، ەرلى-زايىپتىلارعا تۇرمىستىق اۋىرلىق تۇسىرمەيدى.

8. سۇراق قويىڭىز

جۇبىڭىزدى قانشالىقتى جاقسى بىلەمىن دەگەنمەن، ادامداردىڭ ويى، كوزقاراسى ۋاقىت وتە كەلە وزگەرەدى. سوندىقتان كەيدە ودان: وتباسىلىق ومىردەن نە قالايتىنىن، ومىردەن، سىزدەن نە قالايتىنىن سۇراپ تۇرىڭىز. نەنى ارماندايدى؟ نەنى قالايدى؟ ءبىر-ءبىرىڭىزدى تۇسىنگەن سايىن وتباسىلىق ۇندەستىك ورنايدى.

9. ونى وزگەرتۋگە تالپىنباڭىز

جاقىن ادامىڭدى ەشقانداي شارتسىز جاقسى كورە ءبىلۋ، ونى قالاي بار، سولاي قابىلداۋ -  بۇل باقىتتى وتباسىن قۇرۋدىڭ باستى قاعيداسى. ءبىراق كوبى مۇنى ۇمىتىپ كەتىپ جاتادى. ونى كەيدە (نەمەسە ءاردايىم) «جاقسارتقىڭىز» كەلەتىن، «قايتا تاربيەلەگىڭىز» كەلەتىن جانە جالپى ودان ادەپتى ادام جاساعىڭىز كەلەتىن ىقىلاسىڭىزبەن كۇرەسىڭىز.

10. ونىڭ كۇشىنە سەنىڭىز

كۇيەۋىڭىز ەرەسەك ادام، جانە وعان ەكىنشى انا نەمەسە قاتال مۇعالىمنىڭ قاجەتى جوق. ەرەسەك ادام بالالارعا تاماق دايىنداي الادى، دەمالىسقا شابادانىن ءوزى جيناي الادى، وزىنە كيىم تاڭداپ، ءتىس دارىگەرىنە دە ءوزى جازىلا الادى. ونىڭ ماسەلەسى مە؟ ءوزى شەشىپ ۇيرەنسىن. كۇيەۋىڭىزدى جاقسى كورسەڭىز ەشقاشان وعان:

 مەن ساعان ايتتىم ەمەس پە؟!

 بولمايتىن باعدارلامالاردى كورەدى ەكەنسىڭ!

 سويلەسۋمىز كەرەك.

 مەن مۇنىڭ ءبارىن سەن ءۇشىن جاساپ جاتىرمىن!

 ەركەك بولساڭ، بۇيتپەيتىن ەدىڭ... سىندى سوزدەر ايتپاڭىز.

11. قاتەلەسۋگە قۇقىعى بار

ۇنەمى جىلى شىرايلى جۇرەتىن، ەشقاشان كەشىكپەيتىن، ءارقاشان ۋادەسىندە تۇراتىن، تاماقتى كەرەمەت دايىندايتىن جانە تاماشا وتاعاسى جانە اكە بولا الاتىن الەمدە ءمىنسىز ادام جوق. جالپى ءبىر- ءبىرىڭدى شالىس باسۋ مەن قاتەلىك ءۇشىن جازعىرىپ وتىرۋ - ۇلكەن قاتەلىك!

12. كىنالى سەزىندىرمەۋ

ەگەر ادامنىڭ قاتەلىگىن بەتىنە باسا بەرسە، ول ءوزىن كىنالى سەزىنىپ، ول ادامنان قورعاشتانا باستايدى، ال كەيىن ءتىپتى الىس ءجۇرۋدى ارماندايدى. ۇرىس كەزىندە «سەن مەنى جاقسى كورمەيسىڭ!» دەگەننەن گورى، رەنىشتى ناقتى جانە سىندارلى جەتكىزۋدى ۇيرەنىڭىز. ەگەر كۇيەۋىڭىز شىنىمەن كوڭىلىڭىزگە قاياۋ تۇسىرەتىن قىلىق كورسەتسە، ونىڭ دا قاتەلىگىن جۋىپ- شايۋعا، تۇسىندىرۋگە قۇقىعى بار. جانە ءسىز دە ونىڭ شىنايى كەشىرىمىن قابىلداپ، رەنىشتى وتكەن شاقتا قالدىرۋعا تىرىسۋىڭىز كەرەك.

13. سۇقباتتاس ادامى بولىڭىز

جانە بۇل تەك تۇرمىس جاعدايىنا تىرەلمەۋ كەرەك. الەمدە ءتۇرلى قىزىقتى وقيعالار بولىپ جاتىر، وعان دەگەن كوزقاراسىڭىزدى، ويىڭىزدى كۇيەۋىڭىزبەن ءبولىسىڭىز. وعان قىزىقتى تاقىرىپتاردى ساباقتاستىرا الىڭىز. ول ءسىزدىڭ جان-جاقتى ادام ەكەنىڭىزدى ءبىلۋى كەرەك.

14. تىڭداڭىز

كۇيەۋىڭىز قانداي دا ءبىر ماسەلەنى ايتىپ جاتسا، مۇقيات تىڭداپ، ونىمەن ەموتسيونالدى بايلانىسقا ءتۇسىڭىز. ول ءۇشىن ونىڭ ءسوزىن قايتالاپ سۇراۋ دا جەتكىلىكتى. مىسالى، «دەمەك، باستىعىڭ ساعان جاڭا جوبا ۇسىنباقشى ما؟» جانە ونىڭ سەزىمىن باقىلاپ، «سەن ريزا بولعان شىعارسىڭ؟» دەگەن بولجامىڭىزدى ايتىپ، ءوز سەزىمىڭىزدى دە قوسىڭىز: «مەن دە مۇنداي مۇمكىندىككە ريزا بولار ەدىم، ءبىراق جاۋاپكەرشىلىگى دە جوعارى عوي».

15. شىنايى بولمىسىڭىزدى جوعالتپاڭىز

كۇيەۋىڭىزبەن شىنايى بولىڭىز، بەتپەردەنىڭ استىندا تىعىلماڭىز. ءوز سەزىمدەرىڭىز، قالاۋلارىڭىزدى جاسىرماي ايتىڭىز. وسىلايشا ءبىر-ءبىرىڭىزدى جاقسى تۇسىنەتىن بولاسىزدار. البەتتە، ءسىز الەمدەگى ەڭ كەرەمەت ارۋ ەمەسسىز، ءبىراق ول ءدال ءسىزدى جاقسى كورەدى عوي!

 

سوڭعى جاڭالىقتار