الەمدىك جانە ءداستۇرلى دىندەر سەزى 15 جىلدىعىن اتاپ وتپەك
ءدىننىڭ قوعامداعى ءرولىنىڭ ارتىپ كەلە جاتقانىن تۇيسىنە وتىرىپ، الەمدىك جانە ءداستۇرلى دىندەر كوشباسشىلارىنىڭ سەزىن وتكىزۋدى قازاقستان پرەزيدەنتى نۇرسۇلتان نازاربايەۆ باستاما ەتىپ كوتەرگەن بولاتىن.
مەملەكەت باسشىسىنىڭ پايىمى بويىنشا ءوزارا سەنىمدىلىك پەن تۇسىنىستىكتى تۋ ەتكەن الەمدىك جانە ءداستۇرلى دىندەردىڭ كوشباسشىلارى اتالمىش سالاداعى حالىقارالىق ىنتىماقتاستىقتىڭ كەلەشەگىنە ۇلكەن جول اشا وتىرىپ، شىدامسىزدىق، شەتتەتۋ، زورلىق- زومبىلىق، ءدىني ەكسترەميزم مەن تەرروريزم سەكىلدى قاۋىپتىڭ الدىن الادى.
وسىلايشا، 2018 -جىلدىڭ 10-11 - قازانىندا قازاقستاننىڭ ەلورداسى استانادا الەمدىك جانە ءداستۇرلى دىندەر كوشباسشىلارىنىڭ كەزەكتى VI سەزى وتپەك. فورۋمنىڭ تاقىرىبى: «ءدىني كوشباسشىلار قاۋىپسىز الەم ءۇشىن» دەپ اتالادى.
سەز جۇمىسىنا الەمنىڭ 42 ەلىنىڭ سەكسەنگە تارتا دەلەگاتسياسى، اتاپ ايتقاندا ابىرويلى ساياساتكەرلەر، يسلام، حريستيان، يۋدايزم، بۋدديزم، يندۋيزم، داوسيزم، زورواستريزم ءدىنىنىڭ كوشباسشىلارى، سونىمەن قاتار ب ۇ ۇ، ە ق ى ۇ، يۋنەسكو سەكىلدى حالىقارالىق، ءدىني جانە قوعامدىڭ ۇيىمداردىڭ وكىلدەرى قاتىسادى.
VI سەز ەكى پلەنارلىق سەسسيا مەن ءتورت سەكتسيالىق وتىرىستان تۇرادى. سەكسيالىق وتىرىستاردا «جاھاندىق قاۋىپسىزدىك تۇجىرىمداماسى رەتىندەگى «مانيفەست «بەيبىتشىلىك. XXI عاسىر» ، «وزگەرىستەرگە ۇشىراعان گەوساياساتتاعى ءدىن: ادامزاتتىڭ ۇيلەسىمىنىڭ جاڭا مۇمكىندىكتەرى» » ، «ءدىن جانە جاھاندانۋ: سىن- تەگەۋرىندەر مەن جاۋاپتار» ، «ەكسترەميزم مەن تەرروريزمدى جەڭۋدەگى ءدىني كوشباسشىلار مەن ساياسي قايراتكەرلەر» تاقىرىپتارى قوزعالماق.
سونىمەن بىرگە، فورۋم اياسىندا ءدىني كوشباسشىلار كەڭەسىنىڭ ءۇشىنشى وتىرىسى وتەدى.
سەزدىڭ اشىلاتىن العاشقى كۇنى جيىنعا سەربيا رەسپۋبليكاسىنىڭ پرەزيدەنتى الەكساندر ۆۋچيچ، ءال- ازحاردىڭ جوعارعى يمامى شەيح مۋحامماد احماد ات- تايەبا، ە ق ى ۇ باس حاتشىسى توماس گرەمينگەر قاتىسادى.
2015 -جىلى وتكەن V سەز كەزىندەگى مەملەكەت باسشىسىنىڭ باستامالارىن ىسكە اسىرۋ باعىتىندا استانادا بەيبىتشىلىك جانە كەلىسىم مۋزەيىنىڭ اشىلۋى، فورۋمنىڭ جۇمىسى مەن ءدىنياارلىق ديالوگقا ەڭبەك سىڭىرگەنى ءۇشىن استانا حالىقارالىق سىيلىعى مەن قۇرمەتتى مەدالدى تابىستاۋ سالتاناتى وتەدى.
ەسكە سالا كەتسەك، الەمدىك جانە ءداستۇرلى دىندەر كوشباسشىلارىنىڭ ءبىرىنشى سەزى 2003 -جىلدىڭ 23-24 - قىركۇيەگى ارالىعىندا وتكەن بولاتىن.
15 جىلدىڭ ىشىندە الەمدىك جانە ءداستۇرلى دىندەر كوشباسشىلارىنىڭ سەزى كونفەسسيارالىق جانە ءدىنارالىق قارىم- قاتىناس بويىنشا ابىرويلى الاڭعا اينالدى.