قازاقستاندىقتاردىڭ ورتاشا جالاقىسى 158,2 مىڭ تەڭگە بولدى
ءمينيستردىڭ ايتۋىنشا، جىل باسىنان بەرى 414,5 مىڭ ادام جۇمىسقا ورنالاسقان جانە قازان ايىندا جۇمىسسىزدىق دەڭگەيى %4,8 دەيىن تومەندەگەن.
«جالاقى ءبىر قالىپتى قارقىنمەن وسۋدە. بيىلعى قاڭتار- قىركۇيەكتە ورتاشا ايلىق جالاقى 158,2 مىڭ تەڭگەگە دەيىن ۇلعايدى. جالاقىنىڭ ءوسۋى جانە ينفلياتسيالىق پروتسەسستەردىڭ باسەڭدەۋى اياسىندا ناقتى اقشالاي تابىس بيىلعى قاڭتار- تامىزدا %3,5 كە ءوستى»، - دەپ اتاپ ءوتتى تيمۋر سۇلەيمەنوۆ بۇگىنگى ۇكىمەت وتىرىسىندا.
دەگەنمەن، حالىقتىڭ تابىسى بويىنشا وڭىرلەردە ءتۇرلى كورسەتكىشتەر بايقالعان.
«بيىلعى قاڭتار-ماۋسىم ايلارىندا 17 ءوڭىردىڭ 13 ىندە ناقتى تابىستاردىڭ ءوسۋى بايقالىپ وتىر. سونىمەن بىرگە، 4 وڭىردە ناقتى تابىستار ازايعان. ولار - ماڭعىستاۋ (%4,5-)، قىزىلوردا (%2,6-)، الماتى (%0,4-) وبلىستارى جانە الماتى قالاسى (%0,6-)»، - دەدى ت. سۇلەيمەنوۆ.