09:25, 19 - تامىز 2022 | GMT +6
شىعىس قازاقستان اۋىلدارىنداعى 156 كوپبالالى جانە تۇرمىسى تومەن وتباسى باسپاناعا مۇقتاج
وسكەمەن. قازاقپارات - شىعىس قازاقستان وبلىسىنداعى اۋىلداردا 156 كوپبالالى جانە تۇرمىسى تومەن وتباسى باسپاناعا مۇقتاج، دەپ حابارلايدى قازاقپارات ءتىلشىسى.
ش ق و اكىمدىگىندە وڭىردەگى تۇرعىن ءۇي قۇرىلىسى ماسەلەسى تالقىلاندى. وسى تامىز ايىندا 16,7 مىڭ شارشى مەتر ءۇي پايدالانۋعا بەرىلمەك. بۇل كورسەتكىش وتكەن جىلمەن سالىستىرعاندا % 107,8 عا ءوسىپ وتىر.
«قازىرگى ۋاقىتتا حالىق اراسىندا جەر ءۇي سالۋعا دەگەن سۇرانىس زور. سوندىقتان مەن بارلىق قاجەتتى ينفراقۇرىلىمى بار ۋچاسكەلەردى تالداۋعا جانە ولارعا كوممۋنيكاتسيا جۇرگىزۋ ءۇشىن قاجەتتى بيۋدجەت شىعىندارىن ەسەپتەۋگە تاپسىرما بەردىم. بۇگىندە اۋىلداردا تۇرعىن ۇيگە مۇقتاج 156 كوپبالالى جانە تۇرمىسى تومەن وتباسى تۇرادى»، - دەدى ايماق باسشىسى دانيال احمەتوۆ.
ونىڭ ايتۋىنشا، حالىقتىڭ وسى ساناتتارى ءۇشىن ءتورت ءتۇرلى ءۇي جوباسىن دايىنداۋ جانە وسى جوبالاردى ىسكە اسىرۋعا نيەتتى قۇرىلىس كومپانيالارىمەن كەلىسسوزدەر جۇرگىزۋ قاجەت.