تۇركىستاندا 154 شارۋا قوجالىعى ءبىر جەردەن ەكى رەت ءونىم الماق

تۇركىستان. قازاقپارات - تۇركىستان وبلىسى تۇلكىباس اۋدانىنىڭ شارۋالارى بيىل جىل بويىنا ەگىستىككە ەكى رەت كوكونىس تۇرلەرىن وتىرعىزدى. ونداعى ماقسات - مول ءونىم جيىپ الۋ، دەپ حابارلايدى قازاقپارات.

وڭىرلىك كوممۋنيكاتسيالار قىزمەتىنەن ءمالىم ەتكەندەي، بىلتىر وسى جاڭاشىل ءادىستى تاجىريبە رەتىندە سىناپ كورگەن ءبىرقاتار شارۋا تابىسپەن شىققان.

ال بيىل قىزىعۋشىلىق تانىتقان ديقانشىلار قاتارى ارتقان.

بۇگىنگى تاڭدا ءبىر جەردەن ەكى ءونىم الاتىن 154 شارۋاشىلىقتىڭ ءتىزىمى جاسالدى. جالپى كولەمى 265,33 گەكتار جەرگە قىزاناق، قيار، جۇگەرى، نوقات، سارىمساق، كارتوپ كوكونىستەرىن وتىرعىزىپ، مول ءونىم الۋ كوزدەلۋدە. اۋداندىق اۋىل شارۋاشىلىعى ءبولىمى ماماندارىنىڭ بولجامىنا سايكەس، 1- ءونىم 1721,3 توننا، ال 2- ءونىم كولەمى 4358,0 تونناعا جۋىقتايدى.

«تۇلكىباس اۋدانىندا اۋىل شارۋاشىلىعى جانە جاپپاي كاسىپكەرلىكتى دامىتۋ باعىتىندا اۋقىمدى جۇمىستار ىسكە اسىرىلۋدا. قازىرگى تاڭدا اۋدان اكىمدىگىنىڭ ءتيىستى دەربەس بولىمدەرى مەن كەنت، اۋىلدىق وكرۋگ ماماندارى تاراپىنان ءوز كاسىبىن اشۋعا قىزىعۋشىلىق بىلدىرگەن تۇرعىندارعا جان-جاقتى قولداۋلار كۇشەيتىلگەن. سونىمەن قاتار، سۋارمالى جەرلەردى ۇلعايتۋ ماقساتىندا دا جۇيەلى شارالار ىسكە اسۋدا»، - دەلىنگەن مالىمەتتە.