بالالار ەڭبەگىنىڭ قۇربانى 152 ميلليونعا جەتتى - زەرتتەۋ
اسىرەسە قىتاي، بانگلادەش، ءۇندىستاندا بۇل پروبلەمانى شەشۋدە ەش العا جىلجۋ بايقالمايدى. ال بۇگىنگى تاڭدا 152 ميلليون كامەلەتتىك جاسقا تولماعان جەتكىنشەك بالالار ەڭبەگىن زاڭسىز پايدالانۋ قۇربانى بولۋدا»، دەپ جازادى The Guardian باسىلىمى.
اۆتوردىڭ جازۋىنشا، ەكونوميكالىق ءوسىم مەن ءبىلىم بەرۋ سالالارىنىڭ دامىپ جاتقانىنا قاراماستان الەمدە بالالار ەڭبەگىمەن كۇرەس كەنجە قالىپ كەلەدى.
«ەكونوميكالىق يمپۋلس كەدەي مەملەكەتتەرگە ءالى جەتپەدى. سول سەبەپتى دە كەدەي مەملەكەتتەردە بالالار ەڭبەگىن زاڭسىز پايدالانۋ ماسەلەسى شەشىمىن تابار ەمەس»، - دەيدى ادام قۇقىقتارى سالاسىنىڭ ساراپشىسى وسكار لارسسون.
«حالىقارالىق ەڭبەك ۇيىمىنىڭ مالىمەتتەرىنە سايكەس بۇگىنگى تاڭدا الەم بويىنشا 152 ميلليون ادام بالالار ەڭبەگىنىڭ قۇربانى بولۋدا. ولاردىڭ 73 ميلليونى وتە اۋىر جاعدايدا جۇمىس ىستەپ جاتىر»، دەپ جازادى اۆتور.
ونىڭ ايتۋىنشا، بۇل زەرتتەۋ 198 مەملەكەتتەگى زاڭدار مەن حالىقارالىق كەلىسىمدەردى ەسكەرە وتىرىپ جاسالعان.
«بالالاردىڭ ەڭبەك قۇقىعى بۇزىلعان مەملەكەتتەر قاتارىندا سولتۇستىك كورەيا، سومالي، وڭتۇستىك سۋدان، و ا ر بار. سونىمەن قاتار بۇكىل الەم بويىنشا حالىق سانى 900 ميلليوننان اساتىن 27 مەملەكەت بالالار ەڭبەگى ءۇشىن «وتە قاۋىپتى» دەپ تانىلدى.
تاعى 82 مەملەكەت «جوعارى قاۋپى بار» ساناتقا ەندى»، دەپ جازادى اۆتور.
ماقالادا حالىقارالىق كەلىسىمدەر بويىنشا بالا 15 جاسقا تولعانشا ونىڭ دامۋىنا كەدەرگى كەلتىرىپ، دەنساۋلىعىنا زيان تيگىزەتىن جەرلەردە جۇمىس ىستەمەۋى كەرەكتىگى كورسەتىلگەن.
«ب ۇ ۇ بالالار ەڭبەگىنىڭ حالىقارالىق كەلىسىمدەرگە ساي ەمەس جاعدايىن ءجيى انىقتاپ جاتىر. سوعان قاراماستان ب ۇ ۇ 2025-جىلعا قاراي بالالار ەڭبەگىن تۇبەگەيلى جويماق. دەگەنمەن، ساراپشىلار قازىرگى قارقىنمەن بۇل مەجەگە جەتۋ مۇمكىن ەمەس ەكەنىن ايتىپ جاتىر»، دەلىنگەن ماقالادا.