ءسابيت تاجىكوۆ: 150 ايەلدىڭ اراسىندا جالعىز تىگىنشى جىگىتپىن

استانا. قازاقپارات - الماتى وبلىسىندا كەستە تىگىپ، ءساندى جەيدەلەر پىشىندەيتىن ءسابيت تاجىكوۆ ەسىمدى جىگىت تۇرادى.

ادەتتە ەر ادامدار تاڭدامايتىن ماماندىقتى يگەرگەن ول تىگىن فابريكاسىندا جۇمىس ىستەپ جاتىر. Massaget.kz ءتىلشىسى سابيتپەن سۇحباتتاسىپ، بۇل ماماندىقتى نەگە تاڭداعانىن سۇرادى.

ءسابيت مەكتەپتى ءتامامداعاننان كەيىن الماتىداعى كاسىپتىك ءبىلىم بەرەتىن كوللەدجگە وقۋعا ءتۇسىپ، «تىگىنشى- مودەلەر» ماماندىعى بويىنشا كاسىبي ءبىلىم العان. كەيىن ءبىر جىل قالادا ءتۇرلى قىزمەت ىستەگەن، الايدا جانى تىگىنشىلىكتى قالاعان. ءوز بەتىنشە قالىڭ جەمپىرلەر توقىپ، جەيدە تىككەن.

ءۇش اي بۇرىن ۇزىناعاشتا تىگىن فابريكاسى اشىلعان. ءسان ۇلگىسىنە جانى قۇمار ءسابيت كوپ ويلانباستان فابريكاعا جۇمىسقا ورنالاسقان.

«كوللەدجدە 25 قىزدىڭ اراسىندا جالعىز جىگىت ەدىم. سولارمەن بىرگە جارىسىپ، كيىم تىگىپ ۇيرەندىم. باسىندا دوستارىم كۇلەتىن. ءتىپتى مازاقتاعاندار دا بولدى. ءبىراق تىگىن ماشيناسىمەن جۇمىس ىستەگەن وتە قىزىق. سان ءتۇرلى تىگىس بار. ءوزىڭنىڭ ويىڭداعى كيىم ۇلگىسىن شىعارۋعا بولادى. اۋىلدا فابريكا اشىلادى دەپ ويلاماپ ەدىم. وسىندا جۇمىسقا تۇرعانىما قۋانىشتىمىن. كوللەدجدە ون شاقتى قىزدىڭ ورتاسىندا جالعىز بولسام، قازىر فابريكادا 150 ايەلدىڭ اراسىنداعى جالعىز تىگىنشى جىگىتپىن. مەنى اپكەلەرىم ەركەلەتەدى»، - دەپ كۇلەدى ءسابيت.

فابريكا تاپسىرىسپەن جۇمىس ىستەيدى. العاش اشىلعان ايدا اسكەري فورما تىگۋدەن باستاعان. مۇندا تىگىس جاتقىزۋدىڭ سان الۋان ءادىسىن مەڭگەرگەن ايەلدەر ءبىر-بىرىمەن جارىسا جۇمىس ىستەيدى. كەيىن جۇمىسىنا قاراي اقىسىن دا الادى. كەيدە 300 مىڭ تەڭگەدەن اسا تابىس تابۋعا دا مۇمكىندىك بولادى ەكەن.

فابريكانىڭ ءوندىرىس باسشىسى مۇحامەتقالي سابىروۆتىڭ ايتۋىنشا، بۇرىن ينە ءجىپ ۇستاپ كورمەگەن ايەلدەردە دە جۇمىسقا قابىلدانعان.

«ۇجىمنىڭ ىشىندە بۇرىن كىيم تىككەن تىگىنشىلەر بار. تىگىن ماشيناسىنا وتىرىپ كورمەگەن ادامدار دا بولدى. تەحنولوگىمىز باسىنان اياعىنا دەيىن ۇيرەتىپ جاتىر. باسىندا ەشتەڭە بىلمەي كەلگەن تىگىنشىلىرەمىز قازىر ايىنا 200-300 جيىنتىققا دەيىن فورما تىگەدى. سابيت تە ولاردان قالىسپايدى»، - دەيدى ءوندىرىس باسشىسى.

ءسابيت ءساندى كيىمدەر تىگىپ، الەمگە ايگىلى يتاليالىق ديزاينەرلەر Giorgio Armani, Gucci سىندى مىقتى مامان بولۋدى ارماندايدى. بولاشاقتا ول فابريكادان تاجىريبە جيناقتاپ، ءوز كاسىبىن اشقىسى كەلەدى.

«تىگىنشىلىك ەشقاشان جالىقتىرعان ەمەس. قايتا كۇن سايىن ەلىكتىرىپ، قىزىقتىرادى. قازىر جالاقىم جاقسى. اقشامدى جيناپ، بيزنەس باستاۋدى ويلاپ ءجۇرمىن. نارىقتا ەرەكشە ۇلگىدەگى، ساپالى كيىمدەرگە ءاردايىم سۇرانىس بار عوي. مەن سولاردى تىككىم كەلەدى»، - دەيدى ءسابيت.