پاريجدە احمەت بايتۇرسىن ۇلىنىڭ 150 جىلدىعىنا ارنالعان حالىقارالىق كونفەرەنسيا ءوتتى
بۇل تۋرالى عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ رەسمي سايتى ءمالىم ەتتى.
«احمەت بايتۇرسىن ۇلى جانە رەنەسسانستىق وركەنيەت» دەگەن تاقىرىپپەن وتكەن حالىقارالىق كونفەرەنسيادا قازاقستاننان ارنايى بارعان الاشتانۋشىلار مەن قوعام قايراتكەرلەرى، تۇركيا جانە ازەربايجان عالىمدارى، گەرمانيانىڭ ميۋنحەن قالاسىنان بارعان ەۋروپا قازاقتارى قاۋىمداستىعىنىڭ ءتوراعاسى ابدۋلقايۋم كەسيجي بايانداما جاسادى.
سونداي-اق، يۋنەسكو ۇيىمى باس ديرەكتورىنىڭ ورىنباسارى سين سيۋي دە كونفەرەنسيادا ءسوز الىپ، قۇتتىقتاۋ جولدادى.
شارا اياسىندا احمەت باتۇرسىن ۇلىنىڭ ءومىرى مەن قىزمەتىن سيپاتتايتىن كورمە ۇيىمداستىرىلىپ، «قازاق وركەنيەتى جانە احمەت بايتۇرسىن ۇلى» اتتى بەينەروليك كورسەتىلگەن.
شارانىڭ سوڭىندا قازاق، تۇرىك، اعىلشىن جانە ورىس تىلدەرىندە جازىلعان «احمەت بايتۇرسىن ۇلى. تاڭدامالى شىعارمالارى» اتتى كىتاپتىڭ تۇساۋكەسەرى بولدى.
