اقمولا وبلىسىندا قاجىمۇقان مۇڭايتپاسوۆتىڭ 150 جىلدىعىنا ارنالعان كونفەرەنسيا ءوتتى
كونفەرەنسيادا اقمولا وبلىسى ىشكى ساياسات باسقارماسى باسشىسىنىڭ ورىنباسارى ناريمان ءابدراحمانوۆ قۇتتىقتاۋ ءسوز سويلەدى.
«ەل تاۋەلسىزدىگىنىڭ مەرەيتويلىق جىلىندا ءبىز ۇلى جەرلەسىمىز، اتى اڭىزعا اينالعان قازاق بالۋانى قاجىمۇقاننىڭ 150 جىلدىعىن اتاپ وتۋدەمىز. كۇش اتاسى ءوزىن عانا ەمەس، ءوز حالقىن دا حالىقارالىق ارەنادا دارىپتەدى. ول الەمنىڭ 54 ەلىندە وتكەن جارىستارعا قاتىسىپ، 48 مەدال جەڭىپ الدى. اتاقتى بالۋاننىڭ بۇل جەتىستىكتەرى ەلىمىزدەگى سپورتتىڭ دامۋىنا، سالاۋاتتى ءومىر سالتىن ناسيحاتتاۋعا جانە جاستاردى سپورتپەن شۇعىلدانۋعا تارتۋعا اسەر ەتكەنى ءسوزسىز»، - دەپ اتاپ ءوتتى ول.
قاجىمۇقان مۇڭايتپاسوۆتىڭ ءومىرى مەن قىزمەتىنىڭ ۇلتتىق سپورت پەن مادەنيەتتى دامىتۋعا اسەرى، ونىڭ قازاق كۇرەس مەكتەبىنىڭ قالىپتاسۋىنا قوسقان ۇلەسى تۋرالى عالىمدار، قوعام قايراتكەرلەرى، تۇركيا، قىتاي، موڭعوليا، قازاقستان سپورتشىلارى، دۇنيەجۇزى قازاقتارى قاۋىمداستىعىنىڭ، «وتانداستار قورى» كوممەرتسيالىق ەمەس اكسيونەرلىك قوعامى وكىلدەرى بايانداما جاسادى.
وبلىستا اتاقتى بالۋاننىڭ مەرەيتويىنا وراي ءبىرقاتار ءىس-شارالار وتكىزىلدى. ءساۋىر ايىندا سەلينوگراد اۋدانى قاجىمۇقان اۋىلىندا «جاھاندىق كۇش يەسى-قاجىمۇقان» اتتى ونلاين - كونفەرەنسيا ءوتتى. ءىس-شارا اياسىندا «الەمدى بىلەگىندە ويناتقان بالۋان» كورمەسى ۇيىمداستىرىلدى، وندا تۇركىستان وبلىسىنداعى اتتاس سپورت مۇراجايىنان جەتكىزىلگەن بالۋاننىڭ جەكە زاتتارى ۇسىنىلدى، سونداي-اق اقمولا وبلىسى بالۋاندارىنىڭ قاتىسۋىمەن سپورتتىق قويىلىم ءوتتى.
وڭىردە داڭقتى جەرلەسىمىزدىڭ ەسىمى 12 كوشەگە، ەلدى مەكەنگە، سونداي-اق 700 دەن استام بالا ءبىلىم الاتىن 3№ وليمپيادالىق رەزەرۆتىڭ وبلىستىق مامانداندىرىلعان بالالار-جاس وسپىرىمدەر مەكتەبىنە بەرىلدى.
سەلينوگراد اۋدانى مەن ستەپنوگوردە بالۋان ەسكەرتكىشتەرى، اتتاس اۋىلدا مەموريالدىق تاقتا ورناتىلدى.