ەلوردادا «اباي» سپەكتاكلىنە 150 ۇلتتىق كوستيۋم دايىندالىپ جاتىر

نۇر-سۇلتان. قازاقپارات - ەلوردادا ق. قۋانىشبايەۆ اتىنداعى مەملەكەتتىك دراما تەاترى جاڭا عيماراتقا كوشپەك.

جاڭا ونەر عيماراتىنىڭ شىمىلدىعى «اباي» سپەكتاكلىمەن اشىلادى. بۇگىندە اتالعان سپەكتاكل كەيىپكەرلەرىنە ارنالىپ 150 ۇلتتىق كوستيۋم ازىرلەنۋدە. وسى ورايدا سپەكتاكل كوستيۋمدەرى نوبايىنىڭ اۆتورى، سۋرەتشى جانە تىگىنشى قايروللا ابىشيەۆ قازاقپارات تىلشىسىنە جۇمىس بارىسى تۋرالى ايتىپ بەردى.

«مەن ءۇشىن بيىلعى جىل جەمىستى بولدى. ونىڭ دالەلى اباي جىلىندا ەلورداداعى قازاق دراما تەاترى جاڭا عيماراتىنىڭ شىمىلدىعىن اشاتىن «اباي» سپەكتاكلىنە ارنالعان كوستيۋمدەردى تىگۋ ماعان بۇيىردى. اباي تۋرالى قويىلىمعا كيىم تىگۋ مەن ءۇشىن اسا قۇرمەت. سپەكتاكل كوستيۋمدەرىن دايىنداۋ ىسىمەن مەنىمەن بىرگە تاعى 2 سۋرەتشى اينالىسىپ جاتىر. ۇلتتىق كوستيۋمدەردىڭ نوبايىن جاساماس بۇرىن، سول زامانعى كيىمدەردىڭ تاريحىمەن تانىستىم. ⅩⅨ عاسىردىڭ كيىمدەرى ماعان ەرەكشە اسەر قالدىردى جانە الداعى جاڭا توپتامامدى ازىرلەۋدە سول كەزەڭنىڭ ءسان ۇلگىسىن قولداناتىن بولامىن»، - دەدى قايروللا ابىشيەۆ.

سونداي-اق، اۆتور الدىمەن «اباي» سپەكتاكلىنىڭ سەناريىمەن تانىسىپ شىققان. «ول زاماندا اۋقاتتى ادامدار قىمبات ماتادان كيىمدەر كيگەن جانە ول ماتالاردى كوبىنە شەتەلدەن العىزعان، نەگىزىنەن قىتاي مەن ءۇندىستان ەلدەرىنەن. قازىر 143 ۇلتتىق كوستيۋم دايىن، ودان بولەك رەجيسسەر قوسىمشا كەيىپكەرلەردىڭ بولاتىنىن ايتتى. ناتيجەسىندە سپەكتاكلدە ارتىستەر بارلىعى 150 دەي ۇلتتىق كوستيۋم كيەدى»، - دەيدى ول.

ونىڭ ايتۋىنشا، كوستيۋمدەردى دايىنداۋعا بىرنەشە اي ۋاقىت كەتتى جانە وعان 15 مامان جۇمىلدىرىلدى.

«سپەكتاكلدە اباي ءومىرىنىڭ 5 كەزەڭى كورسەتىلەدى. ياعني بالالىق شاعىنان باستاپ، ءومىرىنىڭ سوڭعى ساتىنە دەيىن. سايكەسىنشە جاس ەرەكشەلىگىنە قاراي ابايدى سومدايتىن كەيىپكەرلەرگە 5 ءتۇرلى كوستيۋم دايىندادىق. اباي قازاق حالقى ءۇشىن ۇلى ادام، سوندىقتان دا بۇل جۇمىس ەرەكشە ىنتا-جىگەر مەن ەڭبەكتى قاجەت ەتۋدە»، - دەدى اۆتور.