پەتروپاۆلدا تاعى 150 ءۇي بۇزىلادى

پەتروپاۆل. قازاقپارات - پەتروپاۆلدىڭ كىرەبەرىسىندە بوي كوتەرىپ جاتقان «جاس وركەن» شاعىن اۋدانىنىڭ قۇرىلىسى جالعاسىپ جاتىر، دەپ حابارلايدى قازاقپارات ءتىلشىسى.

سولتۇستىك قازاقستان وبلىسىنىڭ اكىمى قۇمار اقساقالوۆ قۇرىلىس الاڭىنا بارىپ، جۇمىستىڭ قارقىنىن سىنعا الدى. ءوڭىر باسشىسى قازاقستاننىڭ سولتۇستىگىندەگى قۇرىلىس ماۋسىمى ءبىرشاما قىسقا بولعاندىقتان، ءاربىر كۇندى ءتيىمدى پايدالانىپ، ەكى اۋىسىممەن جۇمىس ىستەۋ قاجەت ەكەنىن قاداپ ايتتى.

شاعىن اۋدانداعى 10 تۇرعىن ءۇي كەشەنىندە 10 مىڭ پاتەر حالىق يگىلىگىنە بەرىلۋى ءتيىس. قازىر ۇيلەر مەن الەۋمەتتىك نىسانداردىڭ قۇرىلىسى ءجۇرىپ جاتىر. جاڭا عيماراتتاردىڭ بوي كوتەرۋى ءۇشىن جەكەمەنشىك سەكتورعا تيەسىلى ۇيلەر بۇزىلادى.

پەتروپاۆل اكىمى مارات تاسماعانبەتوۆتىڭ ايتۋىنشا، قازىرگە دەيىن 640-تان استام ءۇي بۇزىلعان. قالا باسشىنىڭ مالىمدەۋىنشە، ول ۇيلەردىڭ يەلەرىنە اقشالاي وتەماقى نەمەسە ەسكى ۇيىنە ساي جاڭا باسپانا ۇسىنىلادى. تۇرعىنداردىڭ بارلىعى جاڭا پاتەردى تاڭداپ وتىر.

بۇل شاعىن اۋدانداعى ۇيلەر 1950-جىلدارى سالىنعان. ولاردىڭ قۇنى شامامەن 8 ميلليون تەڭگە اينالاسىندا باعالانىپ وتىر. پەتروپاۆلدا بۇل اقشاعا كەڭدىگى ءدال وسىنداي باسپانا ساتىپ الۋ مۇمكىن ەمەس.

«جالپى العاندا، ءبىر كۆارتالدا 40 ءۇي سالىنادى. بولاشاقتى ەسكەرسەك، اۋرۋحانا سالۋ ءۇشىن كەم دەگەندە 87 ءۇي، مەكتەپ ءۇشىن 60 ءۇيدى بۇزۋ قاجەت. اۋرۋحانانى 8-مەكتەپكە جاقىن ماڭداعى ۋچاسكەگە سالامىز دەپ جوسپارلاپ وتىرمىز. سوندا كوممەرتسيالىق نىسانداردى بۇزۋدىڭ قاجەتى بولمايدى»، - دەيدى م. تاسماعانبەتوۆ.

قۇمار اقساقالوۆ كەلەر جىلى ەكىنشى جەلىنىڭ - جەكەشەلەندىرۋ قۇقىعىنسىز جالعا بەرىلەتىن ۇيلەردىڭ قۇرىلىسىنا كىرىسۋ قاجەتتىگىن ايتتى.

«ەسكى ۇيلەردى بۇزۋ ارقىلى قالا تۇرعىندارىنىڭ ءومىرىن جاقسارتامىز. ولاردىڭ ورنىنا 2,5-3 ەسە كوپ پاتەر سالىنادى. بۇل قالانىڭ ءوسىمى ءۇشىن ءتيىمدى»، - دەيدى وبلىس اكىمى.