دەنساۋلىق ۆيتسە-ءمينيسترى 1500 تىنىس الۋ قۇرىلعىسىن وڭىرلەرگە جەتكىزۋگە قاتىستى تۇسىنىكتەمە بەردى
«اسسەلسان ينجينيرينگ» ج ش س شىعارعان وتاندىق 1500 وكپەنى جاساندى جەلدەتكىش اپپاراتىن ق ر يندۋستريا جانە ينفراقۇرىلىمدىق دامۋ مينيسترلىگى ق ر ۇكىمەتىنىڭ رەزەرۆتىك قاراجاتى ەسەبىنەن ساتىپ الدى.
«قازاقستان رەسپۋبليكاسى دەنساۋلىق ساقتاۋ مينيسترلىگى كۇن سايىن 297 مەديتسينالىق ۇيىمعا قۇرىلعىلاردىڭ جەتكىزىلۋىن باقىلاپ وتىر. قازىرگى ۋاقىتتا وسى مەديتسينالىق ۇيىمداردىڭ بارلىعى 1500 قۇرىلعىنى قابىلداۋ اكتىلەرىنە قول قويدى. وسىلايشا، ولار پايدالانۋعا دايىن»، - دەدى ق ر دەنساۋلىق ساقتاۋ ۆيتسە-ءمينيسترى اسەم ءنۇسىپوۆا.
كەلىسىمشارتتىڭ نەگىزگى تالابى تەحنيكالىق ەرەكشەلىككە سايكەستىگىن قايتا تەكسەرگەننەن كەيىن قۇرىلعىلاردى قابىلداۋ بولدى. ايتا كەتۋ كەرەك، ىسكە قوسۋ پروتسەسى قۇرىلعىلاردى ورناتۋدى، رەتتەۋدى، ىسكە قوسۋدى، ولاردىڭ سيپاتتامالارىن تەكسەرۋدى، باعدارلامالىق جاساقتاماعا قول جەتكىزۋ ءۇشىن سەرۆيستىك كودتار بويىنشا ءوندىرۋشىنىڭ بىلىكتى مامانداردى وقىتۋىن قامتيدى.
بارلىق قۇرىلعىلار وسى سىناقتان ءوتتى، ولار دىمقىلداتقىشتارمەن، كومپرەسسورلارمەن جانە باسقا دا قاجەتتى كومپونەنتتەرمەن جابدىقتالعان. اسەم ءنۇسىپوۆا جاقىندا كوتەرىلگەن دەپۋتات سىنىنا وراي، حالىق قالاۋلىسىنىڭ قاراشا ايىنىڭ باسىندا وڭىرلەرگە قويىلعان اپپاراتتار كەزەڭ-كەزەڭىمەن پايدالانۋعا بەرىلىپ، قاجەتتى ينستاللياتسيالاۋ مەن رەتكە كەلتىرۋ راسىمدەرى ءوتىپ جاتقاندا جاسالعان مونيتورينگ دەرەكتەرىن العا تارتقانىن اتاپ ءوتتى.
ءبىراق سول كەزدىڭ وزىندە بارلىق 1500 اپپارات ەلىمىزدىڭ وڭىرلەرىنە جەتكىزىلگەن. شىعىس قازاقستان وبلىسىنا كەلەتىن بولساق، وبلىستىڭ دەنساۋلىق ساقتاۋ باسقارماسىنىڭ مالىمەتىنشە، بارلىق 100 اپپارات ءوڭىردىڭ 34 اۋرۋحاناسىنا جەتكىزىلگەن، سونداي-اق، پايدالانۋعا دايىن.
وسىلايشا، وتاندىق ءوندىرىستىڭ 1500 ءو ج ج اپپاراتىن جەتكىزۋ اياقتالدى، بارلىق اپپاراتتار جۇمىس جاعدايىندا. بارلىق ءو ج ج اپپاراتتارىنا 37 اي كەپىلدىك بەرىلەدى جانە ءوندىرۋشى قىزمەت كورسەتۋ بويىنشا بارلىق جاعدايدى نازاردا ۇستايدى.
ەسكە سالساق، سەناتور نۇرلان قىلىشبايەۆتىڭ وكپەنى جاساندى جەلدەتەتىن وتاندىق اپپاراتتاردىڭ ءبىر بولىگىن دەنساۋلىق ساقتاۋ ۇيىمدارى قابىلداماعانى تۋرالى ايتتى. بۇعان ق ر يندۋستريا جانە ينفراقۇرىلىمدىق دامۋ ۆيتسە-ءمينيسترى تالعات جانجۇمەنوۆ جاۋاپ بەردى.