بەيجىڭدە 1500 گە جۋىق قازاقستاندىق سايلاۋعا قاتىسا الادى
بۇل تۋرالى ق ح ر- داعى ق ر ەلشىسى شاحرات نۇرىشيەۆ ارنايى بريفينگتە مالىمدەدى، دەپ حابارلايدى قازاقپارات مەنشىكتى ءتىلشىسى.
«ق ح ر- داعى ق ر ەلشىلىگى جانىندا №257 سايلاۋ ۋچاسكەسى جۇمىس ىستەيدى. ءبىزدىڭ دەرەكتەر بويىنشا، بەيجىڭدە 1500 قازاقستاندىق سايلاۋشى بار. ولاردىڭ اراسىندا ستۋدەنتتەر، جاقىن ماڭدا ورنالاسقان قالالارداعى اسكەري جوو كۋرسانتتارى، ديپلوماتتار، ۇلتتىق كومپانيا وكىلدەرى مەن ولاردىڭ وتباسى مۇشەلەرى بار»، - دەدى ول قازاقپارات ءتىلشىسىنىڭ قويعان سۇراعىنا جاۋاپ بەرە وتىرىپ.
ونىڭ ايتۋىنشا، سايلاۋ ۋچاسكەلەرى شاڭحاي (№294) جانە گونكونگ (№293) قالالارىنداعى باس كونسۋلدىقتار جانىندا دا اشىلادى.
«جەكە شاقىرتۋمەن، قىزمەتتىك، ىسكەرلىك جانە تۋريستىك ساپارلارمەن قىتايعا كەلگەن قازاقستان رەسپۋبليكاسىنىڭ ازاماتتارى ۋچاسكەلىك سايلاۋ كوميسسياسىنا ءوتىنىش بەرگەن جاعدايدا جانە ق ر ازاماتتىعى تۋرالى ءتولقۇجاتى بولسا، سايلاۋشىلار تىزىمىنە ەنگىزىلەدى»، - دەپ اتاپ ءوتتى ش. نۇرىشيەۆ.
قازاقستاندىق ديپلومات قىتايلىق جۋرناليستەرگە ەلدىڭ الداعى سايلاۋعا دايىندىعى، مەملەكەت باسشىسى لاۋازىمىنا ۇمىتكەرلەر جايلى، حالىقارالىق باقىلاۋشىلار تۋرالى قىسقاشا ايتىپ بەردى.
اۆتور: سادىق اكەجانوۆ