سولتۇستىك قازاقستاندا 14 قوي كولىك استىنا ءتۇسىپ، قىرىلدى

None
None
پەتروپاۆل. قازاقپارات - سولتۇستىك قازاقستان وبلىسىندا كولىك جۇرگىزۋشىسى تۇنگى ۋاقىتتا اۆتوجولدىڭ ۇستىنە شىعىپ كەتكەن قويلارمەن سوقتىعىسىپ، سالدارىنان 14 مال ءولدى، دەپ حابارلايدى قازاقپارات ءتىلشىسى.

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، وقىس وقيعا 11 - قازانعا قاراعان ءتۇنى «نۇر-سۇلتان-پەتروپاۆل» اۆتوجولىنىڭ 370 شاقىرىمىندا، تايىنشا اۋدانى كرەمەنچۋگ اۋىلىنىڭ ماڭىندا بولعان.

كوكشەتاۋ قالاسىنىڭ 36 جاستاعى تۇرعىنى «ۆاز 2115» اۆتوكولىگىمەن كەلە جاتىپ، جولعا شىعىپ كەتكەن قويلاردى كەش بايقاعان. سالدارىنان ماشينا مالداردى قاعىپ ءوتىپ، 14 قوي ءولدى.

جۇرگىزۋشى زارداپ شەككەن جوق، كولىك مەحانيكالىق زاقىمدالدى. جانۋارلاردىڭ يەسىنە مالدى جولعا شىعارعانى ءۇشىن اكىمشىلىك حاتتاما تولتىرىلدى.

«وسىعان ۇقساس جول-كولىك وقيعاسى قىركۇيەك ايىنىڭ سوڭىندا ەسىل اۋدانىنىڭ اۋماعىندا بولعان ەدى. ول جولى دا 14 باس قوي قىرىلدى. پوليتسيا قىزمەتكەرلەرى وسىنداي وقيعالارعا اكەلەتىن ەركىن مال جايۋ فاكتىلەرىنىڭ الدىن الۋ ءۇشىن جۇمىستار جۇرگىزەدى. مال ايداۋشىلار دا قىراعىلىق تانىتۋ كەرەك. ولار جول قوزعالىسىنىڭ قاتىسۋشىلارى، سوندىقتان بەلگىلەنگەن ەرەجەلەردى ساقتاۋ كەرەك. مال يەلەرى مەن باقتاشىلار مالدىڭ جولعا كەنەتتەن شىعۋىنا جول بەرمەۋى كەرەك. تۇلىكتى جول بويىمەن تاۋلىكتىڭ جارىق ۋاقىتىندا عانا ايداپ وتۋگە بولادى. ال قاراڭعى ۋاقىتتا وتكىزۋ ءۇشىن جاقىنداپ كەلە جاتقان اۆتوموبيلدەرگە فونارمەن نەمەسە الاۋمەن سيگنال بەرۋ مىندەتتى»، - دەيدى س ق و پ د ج پ ق باسقارماسىنىڭ باستىعى ايدىن بايماتوۆ.

سوڭعى جاڭالىقتار