قازاقستاندا كىرپىش شىعاراتىن 14 زاۋىت سالىنادى
بۇل تۋرالى ق ر يندۋستريا جانە ينفراقۇرىلىمدىق دامۋ ءبىرىنشى ۆيتسە- ءمينيسترى قايىربەك وسكەنبايەۆ ايتتى، دەپ حابارلايدى قازاقپارات ءتىلشىسى.
«قازىر ارماتۋر وندىرەتىن جاڭا 3 زاۋىت سالىنىپ جاتىر، سونىڭ ەسەبىنەن 100 پايىز وتاندىق نارىق قامتاماسىز ەتىلەدى. ال كىرپىشكە كەلسەك، بۇگىندە ەلىمىزدە 1 ءىرى، 11 ورتاشا جانە 276 شاعىن كىرپىش شىعاراتىن كاسىپورىن بار. ولار 2 ءتۇرلى كىرپىش جاسايدى، سيليكات جانە كەراميكالىق. قازىرگى ۋاقىتتا اتالعان ونەركاسىپتەر ىشكى نارىقتى 62 پايىزعا كىرپىشپەن قامتاماسىز ەتىپ وتىر. ونىڭ ۇستىنە بىلتىرمەن سالىستىرعاندا بيىل كىرپىش ءوندىرۋ كولەمى 2 ەسەگە ارتىپ وتىر. ەلدەگى سۇرانىستى تولىق قامتاماسىز ەتۋ ماقساتىندا 2022 -جىلدىڭ سوڭىندا دەيىن ەلىمىزدە كىرپىش شىعاراتىن جاڭا 14 زاۋىت سالۋ جوسپارلانىپ وتىر. ونىڭ قۋاتى جىلىنا 440 ميلليون دانا كىرپىش شىعارا الادى. سوندا وتاندىق نارىقتى تولىقتاي ءوز ونىمىمىزبەن قامتي الامىز»، - دەدى ق. وسكەنبايەۆ و ك ق- دە وتكەن باسپا ءسوز ءماسليحاتىندا.
ودان بولەك، ۆيتسە- مينيستر ەلىمىزدىڭ يمپورتقا تاۋەلدىلىگىن ازايتۋ جانە قۇرىلىس ماتەريالدارى باعاسىنىڭ تۇراقتىلىعىن قامتاماسىز ەتۋ ماقساتىندا مينيسترلىك 2021-2025 -جىلدارعا ارنالعان قۇرىلىس يندۋسترياسىن دامىتۋ بويىنشا مەملەكەتتىك باعدارلامانى قابىلدانعانىن تىلگە تيەك ەتتى.
سول سياقتى ق. وسكەنبايەۆتىڭ ايتۋىنشا، قازاقستاندا سۇرانىسقا يە قۇرىلىس ماتەريالدارى مەن ونىڭ باعاسىنا تالداۋ جۇرگىزىلدى. بۇعان دەيىن ءمينيستردىڭ ءبىرىنشى ورىنباسارى ەلىمىزدە تۇرعىن ءۇي قۇرىلىسىنا قۇيىلاتىن ينۆەستيتسيا كولەمىنىڭ وسكەنىن ايتتى.
اۆتور: ءالي يبرايەۆ