14-ماۋسىم. قازاقپارات كۇنتىزبەسى
اتاۋلى كۇندەر دۇنيەجۇزىلىك دونورلار كۇنى
2005 -جىلعى مامىردا وتكەن دۇنيەجۇزىلىك دەنساۋلىق ساقتاۋ اسسامبلەياسىندا الەمنىڭ دەنساۋلىق ساقتاۋ مينيسترلەرى ءوز ەركىمەن قان تاپسىرۋدى قولداۋ تۋرالى ءوتىنىشتى قابىلدادى. بۇكىلالەمدىك قان تاپسىرۋشى كۇنىن جىل سايىن ماۋسىمنىڭ 14 ىندە وتكىزىپ تۇرۋ تۋرالى قارار قابىلداندى.
حالىقارالىق بلوگەر كۇنى
بۇل كۇندى اتاپ ءوتۋ يدەياسى 2004 -جىلى كوتەرىلگەن. 40 ەلدەن 500 ادام بىرىگىپ، بلوگەرلەردىڭ جەكە كۇنى بولۋى كەرەكتىگىنە باستاما جاساعان. وسىلاي جەلىلىك بلوگەرلەر كۇنى پايدا بولدى. 2007 -جىلى 14-ماۋسىمدا ءوزىنىڭ جەكە بلوگى بار ءار ادام وندا شاعىن عانا حابارلاما جازعان. حابارلامادا بۇكىل بلوگەرلەر اراسىنداعى ساليقالى قارىم- قاتىناس جايلى ايتىلعان.
ەستە قالار وقيعالار
1995 -جىلى الماتىدا عالىمدار ۇيىندە قانىش ساتبايەۆ اتىنداعى حالىقارالىق قوردىڭ اشىلۋ سالتاناتى بولدى. قور پرەزيدەنتى بولىپ اقىن كاكىمبەك سالىقوۆ سايلاندى.
2007 -جىلى سىرىم دات ۇلىنىڭ (1742-1802) بەيىتىن انىقتاۋ ماقساتىندا وزبەكستانعا بارىپ كەلگەن باتىس قازاقستان وبلىسىنان شىققان ارنايى ەكسپەديتسيا ءوز بايلامىن ءبىلدىردى. ارنايى ساپار بارىسىندا ەكسپەديتسيا جەتەكشىسى، تاريح عىلىمدارىنىڭ دوكتورى، وبلىستىق تاريح جانە ارحەولوگيا ورتالىعىنىڭ ديرەكتورى، پروفەسسور مۇرات سىدىقوۆ باستاعان عالىمدار جان- جاقتى زەرتتەۋ جۇمىستارىن جۇرگىزدى. سونىڭ ناتيجەسىندە وزبەكستانداعى حورەزم وبلىسى گۇرلەن اۋدانى ورتالىعىنان 9 شاقىرىم جەردەگى مايلىشەڭگەل ەلدى مەكەنىندەگى بەيىت عىلىمي تۇرعىدان باتىر سىرىم دات ۇلىنىكى ەكەندىگى دالەلدەندى. ەكسپەديتسيا سىرىم دات ۇلىنىڭ 265 -جىلدىعىنا وراي ۇيىمداستىرىلعان بولاتىن. ونىڭ قۇرامىنا جەتى ادام كىردى، سونىڭ ىشىندە تانىمال عالىم- ولكەتانۋشىلار، تاريحشىلار، ارحەولوگتار، سىرىم دات ۇلىنىڭ ۇرپاقتارى بار.
2008 -جىلى يسپانيانىڭ ساراگوس قالاسىندا EXPO-2008 كورمەسىندە قازاقستان پاۆيلونى «س» ساناتىنداعى 104 ەلدىڭ اراسىندا ىشكى جانە سىرتقى بەزەندىرۋ كريتەريى بويىنشا قولا جۇلدەگە يە بولدى. قازاقستان پرەزيدەنتى نۇرسۇلتان نازاربايەۆ سول كەزدە العاش رەت استانادا وسىنداي ءىس- شارا وتكىزۋ كەرەكتىگى تۋرالى ايتتى.
2013 -جىلى بريۋسسەلدە ەۋرووداق پەن ورتالىق ازيا ەلدەرى (قازاقستان، قىرعىزستان، تاجىكستان، تۇرىكمەنستان جانە وزبەكستان) اراسىنداعى قاۋىپسىزدىك ماسەلەلەرى بويىنشا جوعارى دەڭگەيدەگى ديالوگتىڭ ءبىرىنشى راۋندى ءوتتى.
2013 -جىلى ابايدىڭ «قارا سوزدەر» كىتابى العاش رەت پولياك تىلىنە اۋدارىلدى. ابايدىڭ «قارا سوزدەرىن» پولياك تىلىنە اۋدارعان حەنريك يانكوۆسكي وزىنە بۇل يدەيانى جۇزەگە اسىرۋعا ۇسىنىس جاساعان ستۋدەنتتەرى ەكەنىن ايتتى. ولار اۋديتوريادا سلايدتان ابايدىڭ فيلوسوفيالىق مۇرالارىمەن، ماتەريالدارمەن تانىسقان ەكەن. اقىرىندا شاكىرتتەرى الەمنىڭ كوپتەگەن تىلدەرىنە اۋدارىلعان ابايدىڭ «قارا سوزدەرى» نەگە وزدەرىنىڭ انا ءتىلى پولياك تىلىندە جوق ەكەنىن سۇراپ، قىزىعۋشىلىق تانىتقان.
2013 -جىلى تاشكەنت قالاسىنىڭ ورتالىعىندا، شايحانتاحۋر اۋدانىنداعى اباي جانە زۋلفيا حونۋم كوشەلەرىنىڭ قيىلىسىندا قازاق حالقىنىڭ ۇلى اقىنى، ويشىلى گۋمانيست ابايعا ەسكەرتكىش ورناتىلدى. ەسكەرتكىشتىڭ جالپى بيىكتىگى - 9,20 م، قولادان جاسالعان.
2016 -جىلى CRIRSCO (Committee for Mineral Reserves International Reporting Standards) حالىقارالىق ستاندارت كوميتەتى گەولوگيالىق بارلاۋ جۇمىستارىنىڭ ناتيجەلەرى، مينەرالدىق رەسۋرستار، KAZRC قورلارى تۋرالى قازاقستاننىڭ جاريا ەسەپتىلىك كودەكسىن ماقۇلدادى جانە CRIRSCO حالىقارالىق ستاندارتتار قۇرامىنا قابىلداندى.
2018 -جىلى اقمولا وبلىسىندا ساق ءداۋىرىنىڭ سيرەك كەزدەسەتىن زاتتارى تابىلدى. ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ وقىتۋشىلارى مەن ستۋدەنتتەرى جەر استىنان ءجاسوسپىرىم قىزدىڭ سۇيەگىن ارشىپ شىعاردى. ونىڭ جانىندا التىن بۇيىمدار بولعان. ءبىزدىڭ داۋىرىمىزگە دەيىنگى VII عاسىردىڭ قىش ىدىستارى دا سول ورىننان تابىلدى.
2019 -جىلى شىعىس قازاقستان وبلىستىق اۋرۋحاناسىندا العاش رەت ەلوردالىق يۋري پيا كارديوكلينيكا دارىگەرلەرى جۇرەككە اسا كۇردەلى وتا جاسادى.