الماتى وبلىسىندا كوپبالالى انا 14-ءسابيىن دۇنيەگە اكەلدى
وتباسىن وسى قۋانىشىمەن اۋدان اكىمى عالياسقار سارىبايەۆ قۇتتىقتادى.
اتاپ وتسەك، بۇل وتباسىعا 2019-جىلى سارىوزەك اۋىلىنان كوپ بالالى ساناتىمەن تۇرعىن ءۇي بەرىلگەن بولاتىن، دەپ حابارلايدى الماتى وبلىسى اكىمىنىڭ باسپا ءسوز قىزمەتى.
سارسەنباي سادۋاقاسوۆ پەن گۇلناز جەڭىسباي قىزىنىڭ شاڭىراق كوتەرگەنىنە 27 جىل بولعان.
بۇگىندە ولار 10 قىز 4 ۇل تاربيەلەپ وتىر، 3 نەمەرە كوردى. كەربۇلاق اۋداندىق اكىمدىگىنىڭ مالىمەتىنە سۇيەنسەك، مەكتەپ قابىرعاسىنداعى بەس بالا وقۋ قۇرالدارىمەن، سپورتتىق كيىممەن، مەكتەپ فورماسىمەن تولىق قامتاماسىز ەتىلگەن، ۇشەۋى بالاباقشا جاسىندا.
ونلاين وقۋلارىنا قاجەتتى نوۋتبۋك تە مەكتەپتەن بەرىلگەن. قىزى ايجان سپورتتىڭ ەرەجەسىز جەكپە-جەك تۇرىنە قاتىسىپ، جۇلدەلى ورىندارعا يە بولىپ ءجۇر. وتاعاسى ماشينيست، مەحانيك، دانەكەرلەۋشى سياقتى كاسىپتەردى ەركىن مەڭگەرگەن.
«ءومىردىڭ ءمانى دە، ءسانى دە - بالا. دەنساۋلىعىم جەتسە، بالا تۋۋدان قاشپايمىن. قازاق «بالانى جاستان» دەگەندى بەكەر ايتپاعان. ۇلكەن قىزىم مۇعالىم. «الدىڭعى اربا قايدا بارسا، سوڭعى اربا سوندا جۇرەدى» دەيدى، سوندىقتان الدىڭعى ۇل-قىزداردى جاقسى تاربيەلەسەڭ، سوڭعىلارى سولارعا ەلىكتەپ، ۇلگى ەتىپ وسەدى دەپ ويلايمىن»، - دەيدى گۇلناز جەڭىسباي قىزى.
ەسكە سالساق، جالپى الماتى وبلىسىندا كوپ بالالى وتباسىلارىنا قاجەتتى كومەك كورسەتۋ جولعا قويىلعان. وتكەن جىلى 2395 وتباسىنا تۇرعىن ءۇي بەرىلسە، سونىڭ 1258 ءى الەۋمەتتىك ءالجۋاز جانە كوپ بالالى وتباسىلار، بۇل قاتاردا 180 وتباسى مەتسەناتتاردىڭ قولداۋىمەن ءۇيلى بولعانىن دا اتاپ ءوتۋ كەرەك.
سول سياقتى وبلىس ورتالىعى تالدىقورعاندا كوپ بالالى انالار جۇمىس ىستەيتىن تىگىن سەحىن اشۋ قولعا الىنعان. قازىرگى كەزدە سەح ورنالاساتىن ورىن جوندەۋدەن وتكىزىلىپ، دايىندالۋ ۇستىندە.
جالپى بيىلعى جىلدىڭ 1- ساۋىرىنە اتاۋلى الەۋمەتتىك كومەك 14761 وتباسىنا 2 ميلليارد 103,9 ميلليون تەڭگە كولەمىندە تاعايىندالعان، ونىڭ ىشىندە از قامتىلعان كوپ بالالى وتباسىلار دا بار.