ق ر پرەزيدەنتى ەكونوميكالىق ىنتىماقتاستىق ۇيىمىنىڭ 14-سامميتىنە قاتىستى

None
None
نۇر- سۇلتان. قازاقپارات - قازاقستان پرەزيدەنتى ەكونوميكالىق ىنتىماقتاستىق ۇيىمىنىڭ 14-سامميتىنە قاتىستى، دەپ حابارلايدى قازاقپارات اقورداعا سىلتەمە جاساپ.

ۆيدەو كونفەرەنتسيا فورماتىندا وتكەن جيىنعا پاكىستان پرەمەر- ءمينيسترى يمران حان، تۇركيا پرەزيدەنتى رەجەپ تاييپ ەردوعان، تۇرىكمەنستان پرەزيدەنتى گۋربانگۋلى بەردىمۇحامەدوۆ، اۋعانستان پرەزيدەنتى اشراف عاني، ازەربايجان پرەزيدەنتى يلحام اليەۆ، يران پرەزيدەنتى حاسان رۋحاني، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيەيەۆ، ەكونوميكالىق ىنتىماقتاستىق ۇيىمىنىڭ باس حاتشىسى حادي سۋلەيمانپۋر قاتىستى.

قاسىم- جومارت توقايەۆ ءسوزىنىڭ باسىندا باۋىرلاس تۇرىك حالقىنا جانە تۇركيا پرەزيدەنتى رەجەپ تاييپ ەردوعانعا پاندەمياعا قارسى كۇرەستە ەلىمىزگە كومەك كورسەتكەنى ءۇشىن ريزاشىلىعىن ءبىلدىردى.

مەملەكەت باسشىسى وسىناۋ قيىن- قىستاۋ كەزەڭدە ەلدەرىمىز جاھاندىق دەڭگەيدەگى ءوزارا كومەك پەن قولداۋدىڭ قانشالىقتى ماڭىزدى ەكەنىنە تاعى ءبىر مارتە كوز جەتكىزگەنىن اتاپ ءوتتى. پرەزيدەنت بايانداماسىندا پاندەميانىڭ ەكونوميكاعا تيگىزگەن كەرى اسەرىن ەڭسەرۋگە باسا ءمان بەردى.

- قاجەتتى قارجىمەن قامتاماسىز ەتىلگەن داعدارىسقا قارسى كەشەندى جوسپاردى ىسكە اسىرۋدىڭ ارقاسىندا قازاقستان پاندەميانىڭ تەرىس اسەرىن بارىنشا ازايتا الدى. ءتىپتى قۇرىلىس، اۋىل شارۋاشىلىعى جانە ءوندىرىس سەكىلدى سالالاردا وسىمگە قول جەتكىزدىك. بيىل ءبىز ىشكى جالپى ءونىم 3 پايىزدان استام وسەدى دەپ جوسپارلاپ وتىرمىز، - دەدى قاسىم- جومارت توقايەۆ.

مەملەكەت باسشىسى ەكونوميكالىق ىنتىماقتاستىق ۇيىمىمەن ىقپالداستىق قازاقستان سىرتقى ساياساتىنىڭ باسىم باعىتتارىنىڭ ءبىرى ەكەنىن اتاپ ءوتتى. پرەزيدەنتتىڭ پىكىرىنشە، ۇيىم اياسىنداعى ءوزارا ءىس- قيمىلدىڭ نەگىزى ينفراقۇرىلىمدىق، الەۋمەتتىك جانە مادەني باعىتتارداعى ءىرى جوبالار بولۋى كەرەك. قىتايمەن بىرلەسىپ قولعا الىنعان ترانسكاسپي حالىقارالىق كولىك باعىتى - سونداي بولاشاعى زور جوبالاردىڭ ءبىرى. اتاپ ايتقاندا، 2019 -جىلدىڭ قاراشا ايىندا قازاقستان، قىتاي، ازەربايجان، گرۋزيا جانە تۇركيانى بايلانىستىراتىن سيان- ىستامبۇل- پراگا باعىتى بويىنشا كونتەينەرلىك پويىزى جۇرە باستادى. بىلتىر ءساۋىر ايىندا سيان- يزمير باعىتىنداعى ءبىرىنشى كونتەينەرلىك قۇرام ءجۇرىپ ءوتتى. ول 7000 شاقىرىم قاشىقتىقتى 16 كۇندە ەڭسەردى.

- بۇل - ءوزارا ىقپالداستىعىمىزدىڭ جاقسى ۇلگىسى. دەگەنمەن ورنىقتى دامۋدى قامتاماسىز ەتۋ ءۇشىن ءالى دە كوپ ءىس اتقارۋىمىز كەرەك. بيىل ءبىز قازاقستان - تۇرىكمەنستان - يران تەمىر جول باعىتىنىڭ تولىق ىسكە قوسىلۋىن قامتاماسىز ەتۋگە ءتيىسپىز. باسقا دا جاڭا باعىتتار پىسىقتالۋدا. تۇركىستان مەن تاشكەنت اراسىنداعى جوعارى جىلدامدىققا ارنالعان تەمىر جول قازاقستاننىڭ دا، وزبەكستاننىڭ دا تۋريستىك الەۋەتىن ارتتىرادى دەپ كۇتىلۋدە. بۇل جول ۋاقىتتى ەكى ساعاتقا دەيىن قىسقارتۋعا جانە ەكى ەل كاسىپكەرلەرى اراسىنداعى بايلانىستاردى جەڭىلدەتىپ، الەۋمەتتىك قاتىناستاردى جاقسارتۋعا مۇمكىندىك بەرەدى، - دەدى قاسىم- جومارت توقايەۆ.

سونىمەن قاتار پرەزيدەنت ءوز سوزىندە قازاقستاننىڭ اۋعانستانداعى ينفراقۇرىلىمدىق جوبالارعا قاتىسىپ جاتقانى تۋرالى مالىمدەدى. قازاقستان رەسەيلىك جانە وزبەكستاندىق سەرىكتەستەرىمەن بىرلەسىپ، مازاري- شاريف - كۆەتتا جانە مازاري- شاريف - پەشاۆار باعىتتارىندا تەمىر جول سالىپ جاتىر.

اۋعانستانمەن اراداعى ەكىجاقتى ساۋدا- ساتتىقتىڭ ءوسىمى بىلتىر 55 پايىز بولعان. بۇل ءوڭىر ءۇشىن تاعى ءبىر ماڭىزدى باسىمدىق - ازىق- تۇلىك قاۋىپسىزدىگى. پرەزيدەنت قازاقستاننىڭ ەكونوميكالىق ىنتىماقتاستىق ۇيىمىنىڭ اۋىل شارۋاشىلىعى سالاسىنا قاتىستى بارلىق باستامالارىن قولدايتىنىن ايتىپ، مۇشە- مەملەكەتتەردى ازىق- تۇلىك قاۋىپسىزدىگى جونىندەگى يسلام ۇيىمىنا (IOFS) قوسىلۋعا شاقىردى. اتالعان ۇيىمنىڭ شتاب- پاتەرى نۇر- سۇلتان قالاسىندا ورنالاسقان.

- ءبىز ديستريبيۋتورلىق جانە لوگيستيكالىق كوتەرمە ورتالىقتارىنىڭ ۇلتتىق جەلىسىن قۇرۋ ءۇشىن جۇمىس ىستەپ جاتىرمىز. ازىق- تۇلىك قاۋىپسىزدىگى مەن ونىڭ قول جەتىمدىلىگى - ورتاق پروبلەما. سوندىقتان ءتيىمدى لوگيستيكا قۇرۋ ءۇشىن كۇش جۇمىلدىرۋدىڭ ماڭىزى زور دەپ سانايمىز. قازاقستان مەن وزبەكستان شەكارادا ساۋدا- ەكونوميكالىق ىنتىماقتاستىقتىڭ حالىقارالىق ورتالىعىن اشادى، - دەدى مەملەكەت باسشىسى.

قاسىم- جومارت توقايەۆ تۋريزم سالاسىنىڭ الەۋەتىن ارتتىرۋ ماسەلەسىنە دە توقتالدى. بۇل سالا پاندەمياعا قاراماستان، ىنتىماقتاستىقتىڭ پەرسپەكتيۆتى باعىتتارىنىڭ ءبىرى بولىپ قالا بەرەدى.

- قازاقستان تۋريستىك سالانىڭ ۇلەسىن 2025 -جىلعا قاراي ىشكى جالپى ءونىمنىڭ 8 پايىزىنا دەيىن جەتكىزۋدى كوزدەپ وتىر. ءبىز ورتالىق ازيا ەلدەرى مەن كۇللى تۇركى الەمى ءۇشىن قاسيەتتى سانالاتىن تۇركىستان قالاسىن بەلسەندى دامىتىپ جاتىرمىز. تەك 2020 -جىلدىڭ وزىندە قالانىڭ ينفراقۇرىلىمىنا، تۇركىستاننىڭ ءتۋريزمى مەن لوگيستيكاسىنا قۇيىلعان ىشكى ينۆەستيتسيا شامامەن 1 ميلليارد دوللاردى قۇرادى. تۇركىستان قازاقستاننىڭ توپ-10 تۋريستىك باعىتىنا كىردى. بۇل سىزدەردىڭ ەلدەرىڭىزدىڭ ينۆەستورلارى مەن تۋريستەرى ءۇشىن تارتىمدى ءوڭىر بولماق، - دەدى پرەزيدەنت.

مەملەكەت باسشىسى دەنساۋلىق ساقتاۋ سالاسى دا قازاقستانعا كەلەتىن شەتەلدىك ينۆەستيتسياعا «تارتىلىس ورتالىعى» بولا الاتىنىن اتاپ ءوتتى. باسەكەگە قابىلەتتى تاريفتەر، جوعارى بىلىكتى جۇمىس كۇشى جانە مەملەكەتتىك- جەكە مەنشىك ارىپتەستىكتىڭ باسقا دا كوپتەگەن مۇمكىندىكتەرى ارقىلى ەلگە تۇرىك كومپانيالارى تارتىلدى. ولار قازاقستاندا جاڭا اۋرۋحانالاردىڭ قۇرىلىسىنا جانە ولاردى جوعارى تەحنولوگيالى مەديتسينالىق قۇرالدارمەن جابدىقتاۋعا اتسالىسۋدا.

- تۇركيانىڭ Rِnesans Holding كومپانياسى قازاقستاننىڭ جەتى قالاسىندا ءوز ەمحانالارىنىڭ قۇرىلىسىن باستاماقشى. سونداي- اق ءبىز قازاق ۇلتتىق ونكولوگيا جانە راديولوگيا ينستيتۋتىمەن بىرلەسە وتىرىپ، بيىل الماتى قالاسىندا توموتەراپيا ورتالىعىن ىسكە قوسۋدى جوسپارلاپ وتىرعان Orhun Medical كومپانياسىنىڭ جۇمىسىنا ساتتىلىك تىلەيمىز. تۇرىك كومپانيالارىمەن ىنتىماقتاستىق جالعاسا بەرەتىنىنە سەنىمدىمىن. سونىمەن قاتار ءبىز قازاقستاننىڭ دەنساۋلىق ساقتاۋ سالاسىنا ينۆەستيتسيا قۇيۋ ءۇشىن باسقا دا قاتىسۋشى- مەملەكەتتەردەگى سەرىكتەستەرىمىزدى شاقىرۋعا نيەتتىمىز، - دەدى قاسىم- جومارت توقايەۆ.

پرەزيدەنت ەكونوميكالىق ىنتىماقتاستىق ۇيىمىنىڭ تيىمدىلىگىن ارتتىرۋ بويىنشا ءبىرقاتار ۇسىنىس جاسادى. ونىڭ ايتۋىنشا، قازاقستان ازياداعى ءوزارا ءىس- قيمىل جانە سەنىم شارالارى جونىندەگى كەڭەستىڭ ءتوراعاسى رەتىندە ەىۇ مەن اوسشك- ءنىڭ ەكونوميكا سالاسىنداعى ىنتىماقتاستىعىن دامىتۋعا قولداۋ كورسەتۋگە ءازىر. اتالعان قۇرىلىمدار اراسىنداعى ءوزارا ءىس- قيمىلداردى كولىك جانە لوگيستيكا، اۋىل شارۋاشىلىعى، قارجى، ەنەرگەتيكا، تۋريزم، سيفرلىق تەحنولوگيالار جانە باسقا دا سالالار بويىنشا دامىتۋعا بولادى.

- ورتاق مۇددەلەردى كوزدەگەن، بىرلەسكەن جوبالاردى ناقتى جۇزەگە اسىرۋعا نەگىزدەلگەن جان- جاقتى ىنتىماقتاستىق قازىرگى سىن- قاتەرلەرگە توتەپ بەرىپ، ەرتەڭگى كۇنگە دايىن بولۋعا مۇمكىندىك جاسايدى دەگەن نيەتتەمىز. ءبىز ۇيىمعا ۇلكەن ءۇمىت ارتامىز، - دەدى مەملەكەت باسشىسى.

ءسوز سوڭىندا قاسىم- جومارت توقايەۆ تۇرىكمەنستانعا ەكونوميكالىق ىنتىماقتاستىق ۇيىمىنداعى ءتوراعالىعىنىڭ ءساتتى وتۋىنە تىلەكتەستىگىن ءبىلدىردى.

سوڭعى جاڭالىقتار