ەندى قىتايدان كەلگەندەردىڭ ءبارى 14 كۇن كارانتيندە بولادى - بەكشين

None
None
تالدىقورعان. قازاقپارات - بۇگىن ق ر باس سانيتار دارىگەرى جانداربەك بەكشين الماتى وبلىسىنىڭ پانفيلوۆ اۋدانىنداعى ءۇش شەكارا بەكەتىندە ورنالاسقان مەديتسينالىق پۋنكتىلەردى تەكسەردى، دەپ حابارلايدى قازاقپارات ءتىلشىسى پانفيلوۆ اۋدانى اكىمىنىڭ باسپا ءسوز قىزمەتىنە سىلتەمە جاساپ.

قازىرگى ۋاقىتتا «قورعاس» شەكارا ماڭى حالىقارالىق ىنتىماقتاستىق ورتالىعى ناۋرىزدىڭ بىرىنە دەيىن جابىق تۇر. ال جولاۋشىلار تاسىمالى توقتاعان «Nur joly» مەن «التىنكول» بەكەتتەرىندە سانيتار- ەپيدەميولوگ ماماندار كۇشەيتىلگەن رەجيمگە كوشكەن.

قازىر جاركەنت قالاسىندا 100 ادامعا ارنالعان ارنايى سانيتارلىق وقشاۋلاۋ ورنى دايىن. سونداي- اق، قاجەت بولا قالعان جاعدايدا قولدانىلاتىن قوسىمشا 160 ورىن قاراستىرىلعان. بارلىق سانيتار- ەپيدەميولوگتار تولىق مەديتسينالىق جابدىقپەن قامتاماسىز ەتىلگەن.

«اقپاننىڭ 20-سىنان باستاپ قىتايدان كەلگەن ادامداردىڭ بارلىعى 14 كۇنگە دەيىن ارنايى سانيتارلىق ورىندا بولادى. ويتكەنى بۇل ۆيرۋستى جۇقتىرعان ادامنان بىردەن ەشقانداي سىرقات بەلگىلەرى بايقالماۋى مۇمكىن. كوروناۆيرۋستىڭ اعزاداعى جاسىرىن كەزەڭى 14 كۇننەن 24 كۇنگە دەيىن سوزىلۋ فاكتىسى انىقتالعان. قىتايدان وتكەن ازاماتتار 14 كۇن جاتىپ شىققاننان كەيىن دە ون كۇن تولىق باقىلاۋدا بولادى. سول سەبەپتى ساقتىق شارالارى جۇرگىزىلىپ جاتىر»، - دەدى جانداربەك بەكشين.

اۆتور: سامال قابىشيەۆا


سوڭعى جاڭالىقتار