قازاقپارات كۇنتىزبەسى: 14- اقپان

None
None
نۇر-سۇلتان. قازاقپارات - قازاقپارات وقىرماندارىنا 2020-جىلعى 14- اقپانعا ارنالعان كۇنتىزبەسىن ۇسىنادى.

اتاۋلى كۇندەر

حالىقارالىق كىتاپ سىيلاۋ كۇنى

2012-جىلدان بەرى جىل سايىن اتاپ وتىلەدى. بۇل كۇن بالالارعا كىتاپ سىيلاپ، ولاردىڭ كىتاپقا دەگەن سۇيىسپەنشىلىگىن وياتاتىن ادامداردىڭ باسىن قوسادى. وعان ا ق ش- تىڭ قاراپايىم تۇرعىنى، بالالار كىتابى سايتىنىڭ نەگىزىن قالاۋشى ەممي برودمۋر حانىم باستاماشىل بولدى.

جۇرەكتىڭ تۋا ءبىتتى اقاۋى تۋرالى اقپاراتتى تاراتۋ كۇنى

تۋا ءبىتتى جۇرەك اقاۋىمەن بالالارى بار وتباسىلارعا كومەك ۇسىناتىن كانادالىق Children's Heart Society كوممەرتسيالىق ەمەس قايىرىمدىلىق ۇيىمى قۇرىلدى. باستامانى HeartKids (اۆستراليا) جانە Dr. Mani Children Heart Foundation (ءۇندىستان) سياقتى ۇيىمدار قولدادى.

ەستە قالار وقيعالار

1992-جىلى مەملەكەتتىك ونوماستيكا كوميسسياسىنىڭ شەشىمىمەن گۋريەۆ وبلىسى مەن گۋريەۆ قالاسىنىڭ اتاۋى اتىراۋ وبلىسى جانە اتىراۋ قالاسى بولىپ وزگەردى. ال پاۆلودار وبلىسىنىڭ ەرماك اۋدانى اقسۋ اۋدانى اتالدى.

1994-جىلى قازاقستان رەسپۋبليكاسى حالىقارالىق اتوم ەنەرگياسى جونىندەگى اگەنتتىككە (ماگاتە) كىردى.

1997-جىلى اق ۇيدە قازاقستان رەسپۋبليكاسى مەن امەريكا قۇراما شتاتتارى پرەزيدەنتتەرىنىڭ كەزدەسۋى بولدى. كەلىسسوزدەردىڭ قورىتىندىسىنا وراي، ق ر پرەزيدەنتى نۇرسۇلتان نازاربايەۆ پەن ا ق ش اكىمشىلىگىنىڭ باسشىسى بيلل كلينتون دەموكراتيالىق ارىپتەستىك تۋرالى حارتياعا قول قويدى.

2011-جىلى قازاقستان رەسپۋبليكاسى ۇكىمەتى استانا قالاسى قان ورتالىعىنىڭ بازاسىندا ق ر دەنساۋلىق ساقتاۋ مينيسترلىگىنىڭ «ترانسفۋزيولوگيا عىلىمي-وڭدىرىستىك ورتالىعى» رەسپۋبليكالىق مەملەكەتتىك كاسىپورنى قۇرىلدى.

2013-جىلى الماتىدا حالىقارالىق بيزنەس اكادەمياسىندا (ح ب ا) نيدەرلاندى ماركەتينگ ينستيتۋتىنىڭ (NIMA) (نيما-باعدارلاما)، قازاقستان ماركەتينگ، جارناما جانە PR فەدەراتسياسىنىڭ (ح م ج ف جانە PR) حالىقارالىق ماركەتينگ مەكتەبىنىڭ باعدارلاماسىنا قاتىسۋشىلاردىڭ ءبىرىنشى توبى ءبىتىرىپ شىقتى.

2014-جىلى الماتىدا قازاقستان ءۇشىن بىرەگەي «مەدەۋ DREAM FEST» فەستيۆالى ءوتتى.

2015-جىلى سەۋلدە (وڭتۇستىك كورەيا) مانەرلەپ سىرعاناۋدان سوچيدەگى وليمپيادا ويىندارىنىڭ قولا جۇلدەگەرى، قازاقستاندىق سپورتشى دەنيس تەن ءتورت قۇرلىق چەمپيوناتىندا التىن مەدال جەڭىپ الدى. ءتورت قۇرلىقتىڭ چەمپيوناتىنا امەريكا، ازيا، افريكا جانە اۋستراليادان كەلگەن مانەرلەپ سىرعاناۋشىلار قاتىستى.

2017-جىلى قازاقستان كاسىپقوي بوكستاعى تيتۋلدار سانى بويىنشا الەمنىڭ ۇزدىك بەس ەلى قاتارىنا قوسىلدى. قازاقستاندىق بوكسشى جانات جاقيانوۆتىڭ 53,5 كەلى سالماق ساناتىندا WBA Super جانە IBO بەلدىكتەرىن جەڭىپ الۋى وسى ناتيجەگە جەتۋگە مۇمكىندىك بەردى.

2017-جىلى دۋبايدا وتكەن The World Government Summit حالىقارالىق ۇكىمەتتىك سامميتىندە قازاقستان «Egov mgov» موبيلدى قوسىمشاسىن ەنگىزگەنى ءۇشىن حالىقارالىق «First World Govtechineers Race-2017» سىيلىعىمەن ماراپاتتالدى. ناگرادانى دۋباي ءامىرى، ب ا ءا پرەمەر-ءمينيسترى ءارى ۆيتسە-پرەزيدەنتى شەيح مۇحاممەد يبن راشيد ءال ماكتۋم تابىس ەتتى.

2017-جىلى اقتاۋ قالاسىنداعى حيميا-بيولوگيالىق باعىتتاعى «نازاربايەۆ زياتكەرلىك مەكتەبىنىڭ» 12-سىنىپ وقۋشىسى ءساتتىعالي جولداسباي ناشار كورەتىن جانە زاعيپ جاندار ءۇشىن ارنايى سمارت-تاقيا ويلاپ تاپتى. مۇنداي يدەيا ءساتتىعاليعا اتاسىنىڭ ۇيىنە اۋىلعا بارعان كەزدە كەلگەن ەكەن. ول اۋىلدا اعاسىنىڭ كوزى ناشار كورگەندىكتەن ىلعي كەدەرگىلەرگە تاپ بولا بەرەتىنىن بايقايدى. اقتاۋعا كەلگەن سوڭ مەكتەپ وقۋشىسى ۇستازىمەن اقىلداسا وتىرىپ، ارنايى قوزعالىس قۇرىلعىسى ورناتىلعان تاقيا جاساپ شىعارادى. بۇل قۇرىلعى جولدا كەزدەسەتىن كەدەرگىلەر جونىندە دىبىستاپ، تاقيانىڭ يەسىنە بەلگى بەرىپ وتىرادى.

2018-جىلى وليمپيادا ارناسى (Olympic Channel) سوچيدەگى وليمپيادا ويىندارىنىڭ قولا جۇلدەگەرى، قازاقستاندىق مانەرلەپ سىرعاناۋشى دەنيس تەن تۋرالى دەرەكتى فيلم جاريالادى.

2019-جىلى نيۋ-يوركتە ب ۇ ۇ جانىنداعى قازاقستان رەسپۋبليكاسى مەن تانزانيا بىرىككەن رەسپۋبليكاسىنىڭ تۇراقتى وكىلدەرى قايرات وماروۆ پەن موداست دجوناتان مەرو ەكى ەل اراسىندا ديپلوماتيالىق قارىم-قاتىناستار ورناتۋ تۋرالى بىرلەسكەن كومميۋنيكەگە قول قويدى.

سوڭعى جاڭالىقتار