ەلوردا اۋەجايىندا بورانعا بايلانىستى 14 رەيس كەيىنگە قالدىرىلدى

None
None
نۇر-سۇلتان. قازاقپارات - نۇرسۇلتان نازاربايەۆ حالىقارالىق اۋەجايىندا قاتتى بورانعا بايلانىستى اۋە رەيستەرى كەيىنگە قالدىرىلدى، دەپ حابارلايدى قازاقپارات اۋەجايدىڭ باسپا ءسوز قىزمەتىنىڭ PR- مەنەدجەرى جەڭىس احمەتجانوۆقا سىلتەمە جاساپ.

قازىرگى تاڭدا 9 رەيس وزگە قالالاردان كەلەتىن ۇشاقتاردىڭ كەشىگۋىنە بايلانىستى كەيىنگە شەگەرىلىپ وتىر. ولار - «FlyArystan» كومپانياسىنىڭ 2 رەيسى (پاۆلودار، ماسكەۋ) جانە «ەير استانا» كومپانياسىنىڭ 7 رەيسى (الماتى - 2 رەيس، قىزىلوردا، شىمكەنت - 2 رەيس، اقتوبە، ورال).

«ال اۋەجايدان ۇشىپ شىعۋعا ءتيىس 5 رەيس، اتاپ ايتقاندا «ەير استانا» كومپانياسىنىڭ الماتىعا ۇشاتىن 4 رەيسى مەن «اەروفلوتتىڭ» ماسكەۋگە قاتىنايتىن ءبىر رەيسىنىڭ ۋاقىتى وزگەرگەن. كۇشتى جەلگە بايلانىستى (جىلدامدىعى سەكۋندىنا - 15 مەتردەن اسادى) قاۋىپسىزدىك ماقساتىندا اۋە كەمەلەرىن مۇز قاتۋعا قارسى سۇيىقتىقپەن وڭدەۋگە جول بەرىلمەيدى»، - دەپ ءمالىم ەتتى جەڭىس احمەتجانوۆ.

قازىرگى ۋاقىتتا نۇرسۇلتان نازاربايەۆ حالىقارالىق اۋەجايى شتاتتىق رەجىمدە جۇمىس ىستەپ جاتىر.

سوڭعى جاڭالىقتار