مەملەكەتتىك بيۋدجەتكە سالىق تۇسىمدەرىنىڭ ءوسۋ قارقىنى 14 پايىزدى قۇرادى - سمايىلوۆ

نۇر- سۇلتان. قازاقپارات - مەملەكەتتىك بيۋدجەت كىرىستەرى بويىنشا جوسپار 101 پايىزعا ورىندالدى. بۇل تۋرالى بۇگىن ۇكىمەت وتىرىسىندا «سالىق جانە كەدەندىك اكىمشىلەندىرۋ» تاقىرىبىندا بايانداما جاساعان ق ر پرەمەر- ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«مەملەكەتتىك بيۋدجەتتىڭ كىرىستەرى بويىنشا جوسپارى 101 پايىزعا ورىندالدى نەمەسە جوسپاردان تىس 76 ميلليارد تەڭگە ءتۇستى. وتكەن جىلدىڭ وسىعان ۇقساس كەزەڭىمەن سالىستىرعاندا تۇسىمدەردىڭ ءوسىمى 14 پايىزعا نەمەسە 911 ميلليارد تەڭگەگە ءوستى. مەملەكەتتىك بيۋدجەتكە سالىق تۇسىمدەرىنىڭ ءوسۋ قارقىنى 14 پايىزدى قۇرادى. ول وتكەن كەزەڭمەن سالىستىرعاندا 886 ميلليارد تەڭگەگە ارتىق»، - دەدى ول.

ونىڭ دەرەگىنشە، ىشكى تۇتىنۋ تاۋارلارىنا قوسىلعان قۇن سالىعى بويىنشا 282 ميلليارد تەڭگەگە، كورپوراتيۆتىك تابىس سالىعى 194 ميلليارد تەڭگەگە جانە ەڭبەكاقى قورىنان سالىقتار بويىنشا 95 ميلليارد تەڭگەگە وسكەنى بايقالادى. سونداي- اق كەدەندىك تولەمدەر دە ءوستى. ەۋرازەق- تەن قوسىلعان قۇن سالىعى بويىنشا 88 ميلليارد تەڭگەگە جانە ءۇشىنشى ەلدەردەن ق ق س 73 ميلليارد تەڭگەگە ارتتى.

«كەلتىرىلگەن ناتيجەلەر فيسكالدىق اكىمشىلەندىرۋدى ارتتىرۋعا باعىتتالعان مەملەكەتتىك كىرىس ورگاندارىنىڭ جۇمىس ستراتەگياسى دۇرىس ەكەندىگىن بىلدىرەدى. 2019 -جىلعا ارنالعان رەسپۋبليكالىق بيۋدجەت كىرىستەرىنىڭ ناقتىلانعان بولجامى 7 تريلليون 81 ميلليارد تەڭگە سوماسىندا ايقىندالدى. 2018 -جىلدىڭ فاكتىسىنە كىرىستەردىڭ 1 تريلليون 233 ميلليارد تەڭگەگە نەمەسە 121 پايىزعا، ونىڭ ىشىندە: ەكونوميكانىڭ جانە ەكسپورتتىق تاۋارلار باعاسىنىڭ وسۋىنە بايلانىستى 393 ميلليارد تەڭگەگە؛ سالىقتىق جانە كەدەندىك اكىمشىلەندىرۋدى جاقسارتۋعا جانە ولاردى تسيفرلاندىرۋعا بايلانىستى 840 ميلليارد تەڭگەگە جىل قورتىندىسى بويىنشا ءوسۋى بولجانىپ وتىر»، - دەدى ءا. سمايىلوۆ.

سونىمەن قاتار ول تاۋەكەلدەردى باسقارۋدىڭ جۇيەسى جەتىلدىرىلىپ جاتقانىن ايتتى. بۇل باقىلاۋ جاساۋ ءۇشىن سۋبەكتىلەردى بارىنشا ءدال ىرىكتەۋگە مۇمكىندىك بەردى جانە جۇرگىزىلىپ جاتقان ءىس- شارالاردىڭ ناتيجەلىگىن ارتتىرادى. ناتيجەسىندە سالىقتىق تەكسەرۋلەردىڭ قورىتىندىلارى بويىنشا انىقتالعان بۇزۋشىلىقتاردىڭ سوماسى 20 پايىزعا ۇلعايدى. قاشىقتان باقىلاۋ ادىستەرى دە جەتىلدىرىلۋدە.

«اعىمداعى جىلى ەلەكتروندى شوت- فاكتۋرالاردى قولدانا وتىرىپ، كامەرالدىق باقىلاۋدىڭ جاڭا راسىمدەرى ەنگىزىلدى. قوسىمشا 221 ميلليارد تەڭگە ەسەپتەلدى - ءوسىم 19 پايىز. 175 ميلليارد تەڭگە ءوندىرىلىپ الىندى. سونداي- اق بيۋدجەتكە سالىق تولەۋدى ىنتالاندىرۋ شارالارى قابىلدانۋدا»، - دەدى مينيستر.

اۆتور: مارلان جيەمباي