يراكتان قازاقستانعا 14 بالا قايتارىلدى
«ولاردىڭ انالارى سوتتالىپ، تۇرمەدە تەرروريستىك ارەكەتكە قاتىستىلىعى ءۇشىن جازاسىن وتەپ جاتىر. اتالمىش گۋمانيتارلىق اكسيا بالالاردىڭ انالارى مەن تۋعان-تۋىستارىنىڭ سۇراۋى بويىنشا سىرتقى ىستەر مينيسترلىگى ءبىرقاتار مەملەكەتتىك ورگاندارمەن، وتاندىق ۇكىمەتتىك ەمەس قۇرىلىمدارمەن جانە حالىقارالىق ۇيىمدارمەن تىعىز بايلانىسا وتىرىپ جۇزەگە اسىردى. يراكتىڭ بيلىگىنە جانە وسى اكسيانى جۇزەگە اسىرۋعا اتسالىسقان بارلىق تۇلعالار مەن ۇيىمدارعا كورسەتكەن كومەگى مەن قولداۋى ءۇشىن شىنايى العىسىمىزدى بىلدىرەمىز»، - دەدى ەلوردادا وتكەن باسپا ءسوز ءماسليحاتىندا ق ر سىرتقى ىستەر ءمينيسترىنىڭ ورىنباسارى ەرجان اشىقبايەۆ.
قۇجاتتاندىرۋ ۇدەرىسى مەن وڭالتۋ كەزەڭى اياقتالعاننان كەيىن بالالار ءوز تۋىستارىمەن قاۋىشادى.
ەسكە سالا كەتسەك، قازاقستانعا يراكتان بالالاردى قايتارۋ جۇمىسى وسى جىلدىڭ باسىنداعى تۇڭعىش پرەزيدەنت - ەلباسى نۇرسۇلتان نازاربايەۆتىڭ سيريادان قازاقستان ازاماتتارىن ەۆاكۋاتسيالاۋ بويىنشا «جۋسان» گۋمانيتارلىق وپەراتسياسىنىڭ جالعاسى بولىپ وتىر.
9 -قازاندا ەلوردادا وتكەن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ە ق ى ۇ) اۋعانستان بويىنشا جيىنىندا ق ر سىرتقى ىستەر ءمينيسترى مۇحتار تىلەۋبەردى قازاقستاننىڭ يراكتان 14 بالانى قايتارۋ باعىتىندا جۇمىس جۇرگىزىپ جاتقانىن حابارلاعان.
«يراكتا جۇرگەن كىشكەنتاي قازاق بالالارىن ەلگە الىپ كەلەمىز. جاقىن ارادا بولۋى كەرەك. وسى ايدىڭ ىشىندە. بالالاردىڭ شەشەلەرى سوتتالىپ، تۇرمەدە وتىر. سوندىقتان، بالالارى جات ەلدە قالماسىن دەپ، وسىنداعى تۋعان- تۋىستارى ءوتىنىش ءبىلدىردى. سول بالالاردى الىپ كەلەمىز. ارينە، بۇقارالىق اقپارات قۇرالدارى وكىلدەرىن اۋەجايدان كۇتىپ الۋعا شاقىرامىز»، - دەگەن بولاتىن ايبەك سمادياروۆ ۆەدومستۆودا وتكەن بريفينگ بارىسىندا.
اۆتور: ايان بەكەن ۇلى