ۇ ق ك: 14 ازاماتقا تەرروريزم بويىنشا ايىپ تاعىلدى
ۇلتتىق قاۋىپسىزدىك كوميتەتى وزگە مەملەكەتتىك ورگاندارمەن جانە شەتەل سەرىكتەستەرىمەن بىرلەسىپ، «جۋسان» وپەراتسياسى شەڭبەرىندە سيريادان 595 قازاقستان ازاماتىن قايتاردى، ونىڭ اراسىندا ءتورت جۇزدەن استامى بالا.
قايتارىلعان ادامداردىڭ ىشىندە 10 ەر ادام مەن 5 ايەل قازاقستاندا تىيىم سالىنعان د ا ي ش حالىقارالىق تەرروريستىك ۇيىمىنىڭ ارەكەتىنە قاتىسۋ فاكتىسى بويىنشا سوت ۇكىمىمەن ءارتۇرلى مەرزىمگە باس بوستاندىعىنان ايىرىلعان.
«تەرگەۋ نۇسقاسى بويىنشا سيريا جاعدايىندا د ا ي ش- تىڭ ءبىر جاساعىندا بولعان تاعى دا 14 ازاماتقا قاتىستى قىلمىستىق ءىستى تەرگەۋ اياقتالدى.
ولارعا تەرروريستىك ارەكەتكە قاتىستى، ارەكەتكە تارتتى جانە تەرروريزمدى ناسيحاتتادى، سونداي-اق وزگە دە اۋىر قىلمىستار جاسادى دەگەن ايىپ تاعىلدى»، دەلىنگەن حابارلامادا.
باسپا ءسوز قىزمەتىنىڭ مالىمەتىنشە، قىلمىستىق ءىس ماتەريالدارى نۇر-سۇلتان قالاسىنىڭ مامانداندىرىلعان اۋدانارالىق قىلمىستىق ىستەر بويىنشا سوتىنا بەرىلدى.