دانيار ەلەۋسىنوۆتىڭ كەلەسى قارسىلاسى - 14 جەڭىسى بار مەكسيكالىق بوكسشى

استانا. قازاقپارات - جارتىلاي ورتا سالماقتا ونەر كورسەتەتىن قازاقستاندىق بوكسشى دانيار ەلەۋسىنوۆتىڭ (5-0، 3 ك و) كەلەسى جەكپە-جەكتەگى قارسىلاسى انىقتالدى، دەپ حابارلايدى قازاقپارات Sports.kz-كە سىلتەمە جاساپ.

BoxRec.com تاراتقان اقپاراتقا سۇيەنسەك، دانيار 29 جاستاعى مەكسيكالىق كارلوس حيمەنەسپەن (14-9-1, 8 كو) جۇدىرىق تۇيىستىرەدى. كەزدەسۋ سەگىز راۋندقا جوسپارلانعان.

ەسكە سالا كەتەيىك، وليمپيادا چەمپيونى كاسىبي رينگتەگى التىنشى ايقاسىن 15 -ناۋرىزدا فيلادەلفيانىڭ (ا ق ش، پەنسيلۆانيا شتاتى) Liacouras Center ارەناسىندا وتكىزەتىنىن حابارلاعان ەدىك.

وسى ۋاقىتتا بوكس كەشىنىڭ حەدلاينەرلەرى رەتىندە IBF تۇجىرىمى بويىنشا ەكىنشى جارتىلاي ورتا سالماقتاعى الەم چەمپيونى تيەۆين فارمەر (28-4-1، 6 ك و) مەن دجونو كەررولل (16-0-1، 3 ك و) تىركەلگەن. سونداي-اق ايەلدەر اراسىندا جەڭىل سالماقتاعى قوس الەم چەمپيونى - WBA جانە IBF بەلدىكتەرىنىڭ يەسى كەتي تەيلور (12-0، 5 ك و) مەن WBO چەمپيونى روۋز ۆولانتە (14-0، 8 ك و) جەكپە-جەگى جوسپارلانعان.