شىعىس قازاقستان ومارتاشىلارى قىتايعا 14 مىڭ توننا بال ساتاتىن بولدى

 استانا. قازاقپارات - قازاقستاننىڭ بال ونىمدەرىن قىتايعا تاۋار تاسىمالداۋشىلار تىزىمىنە كىرگەن ەكى كاسىپورىن عانا كىرگىزە الادى.

بۇل تۋرالى altaynews.kz سايتى حابارلايدى. شىعىس قازاقستان ومارتاشىلارى قىتايعا 14 مىڭ توننا بال وتكىزۋگە مۇمكىندىك الدى.

جاعىمدى جاڭالىقتى وبلىستىق اۋىل شارۋاشىلىعى باسقارماسىنىڭ باسشىسى اسقار جاقىپبايەۆ تۇرعىندارمەن تىكەلەي بايلانىس كەزىندە ايتتى. بال ەكسپورتىنا قاتىستى قويىلعان ساۋالعا جاۋاپ بەرۋ بارىسىندا باسقارما باسشىسى قىتايمەن اسا ماڭىزدى كەلىسىمشارت جاسالعانىن اتادى.

بۇعان دەيىن شىعىس قازاقستاندىق ومارتاشىلار ءونىمىن «شەكاراارالىق ساۋدا» اياسىندا ۆەتەرينارلىق سەرتيفيكات راسىمدەۋ ارقىلى وتكىزىپ كەلگەن. ەكىجاقتى كەلىسىم بويىنشا بۇدان بىلاي قازاقستاننىڭ بال ونىمدەرىن قىتايعا تاۋار تاسىمالداۋشىلار تىزىمىنە كىرگەن ەكى كاسىپورىن عانا كىرگىزە الادى. سونىڭ ءبىرى - شىعىسقازاقستاندىق «پاسەكا» شارۋا قوجالىعى.

«كەشە عانا ماعان «پاسەكا شارۋا قوجالىعىنىڭ وكىلدەرى حابارلاسىپ، ءسۇيىنشى حاباردى جەتكىزدى. قىتايعا «التاي بالى» دەگەن تاۋارلىق بەلگىنى تىركەۋگە ۇسىنعان بولاتىنبىز. ەندى شىعىس قازاقستاننان 14 مىڭ توننا بال الۋ تۋرالى كەلىسىمشارت جاسالادى. سوڭعى ستاتيستيكا بويىنشا، وبلىس اۋماعىندا 3000 توننا بال ساقتاۋل تۇر. مەنىڭ ويىمشا، بۇل ساندى 5 مىڭ تونناعا دەيىن جەتكىزۋگە مۇمكىندىك بار. بۇعان دەيىن جىل سايىنعى ءونىمىن قويمادا ساقتاپ كەلگەن ومارتاشىلاردىڭ ساۋداسى جۇرەتىن بولدى» ، - دەدى اسقار جاقىپبايەۆ.