جاس وسپىرىمدەر وليمپياداسى: قازاقستان 14-ورىندا تۇر

None
None
استانا. قازاقپارات - بۇگىن بۋەنوس-ايرەستەگى جاس وسپىرىمدەر وليمپياداسىنىڭ سوڭعى جارىس كۇنى، دەپ حابارلايدى قازاقپارات ءتىلشىسى.

ءدال بۇگىنگى مەدالدار سانى بويىنشا قازاقستان قۇراماسى جالپى ەسەپتە 4 التىن، 2 كۇمىس، 2 قولا مەدالمەن 14-ورىندا تۇر.

ال، كوش تىزگىنىن 27 التىن، 16 كۇمىس، 12 قولا مەدال ەنشىلەگەن رەسەيلىكتەر ۇستاپ تۇر. ەكىنشى ورىنعا 18 التىن، 9 كۇمىس، 9 قولا مەدالمەن قىتاي سپورتشىلارى جايعاسسا، ۇزدىك ۇشتىكتە 15 التىن، 8 كۇمىس، 12 قولا مەدالمەن جاپونيا ەلىنىڭ وكىلدەرى كەلە جاتىر.

بۇگىن جارىستىڭ سوڭعى كۇنى قازاقستاننان ەل نامىسىن ەكى سپورتشى قورعايدى. ونىڭ ءبىرى التىننان باستى ۇمىتكەر بوكسشى تالعات شايكەن. 64 كەلى سالماقتا فينالعا شىققان بوكسشىمىز بۇگىن ساعات 23.15 شاماسىندا رەسەيلىك يليا پوپوۆپەن التىن مەدال ءۇشىن جەكپە-جەككە شىعادى. ەگەر، وتانداسىمىزعا التىن مەدال بۇيىرىپ جاتسا، جالپى ەسەپتەگى جاعدايىمىز جاقسارا ءتۇسۋى بەك مۇمكىن. سەبەبى، ءبىزدىڭ الدىمىزدا تۇرعان اۆستراليا مەن كولۋمبيا ەلىنىڭ سپورتشىلارى جەڭىپ العان التىن مەدالدار سانى ءبىزدىڭ سپورتشىلاردىكىمەن بىردەي.

سونىمەن قاتار، بۇگىن كاراتەشى ءابلمانسۇر باتىرعالي دا جارىس جولىنا شىعادى. 68 كەلىگە دەيىنگى سالماقتا باق سىنايتىن وتانداسىمىز دا جۇلدەلى ورىنداردان كورىنۋى مۇمكىن. باتىرعالي بۇگىن جارىس جولىنا استانا ۋاقىتى 18.00 شاماسىندا شىعادى.

ەسكە سالساق، بايراقتى دودادا ەل نامىسىن 58 سپورتشى قورعاۋدا.

اۆتور: كۇنسۇلتان وتارباي

 

سوڭعى جاڭالىقتار