بۇرشاق، داۋىل، كۇشتى جەل: سينوپتيكتەردىڭ 14- ماۋسىم كۇنگى اۋا رايى

استانا. قازاقپارات - اتموسفەرالىق فرونتتاردىڭ وتۋىنە بايلانىستى قازاقستان اۋماعىندا قۇبىلمالى اۋا رايى ساقتالادى.

تەك وڭتۇستىك-باتىستا جاۋىن-شاشىنسىز كۇن رايى كۇتىلەدى. كەي جەرلەردە نايزاعاي ويناپ، جاڭبىر جاۋادى، جەل كۇشەيىپ، داۋىل سوعادى، بۇرشاق جاۋۋى مۇمكىن، وڭتۇستىكتە شاڭدى داۋىل بولادى، دەپ حابارلايدى قازاقپارات «قازگيدرومەت» ر م ك- عا سىلتەمە جاساپ.

اتاپ ايتقاندا، سولتۇستىك قازاقستان وبلىسىنىڭ كەي جەرلەرىندە نايزاعاي ويناپ، داۋىل تۇرادى، بۇرشاق جاۋۋى مۇمكىن. تۇندە كەي جەرلەردە جانە كۇندىز باسىم بولىگىندە 15-20 م/س كۇشپەن جەل سوعادى، ەكپىنى 23-28 م/س جەتۋى ىقتيمال.

جامبىل وبلىسىنىڭ كەي جەرلەرىندە نايزاعاي ويناپ، داۋىل بولادى، بۇرشاق جاۋۋى مۇمكىن. جەلدىڭ جىلدامدىعى 23 م/س كۇشەيەدى.

وڭتۇستىك قازاقستان، پاۆلودار وبلىستارىنىڭ جەكەلەگەن جەرلەرىندە نايزاعاي ويناپ، داۋىل تۇرادى، بۇرشاق جاۋۋى مۇمكىن، جەل 15-20 م/س كۇشەيەدى. وڭتۇستىك قازاقستان وبلىسىندا سونداي-اق شاڭدى داۋىل كۇتىلەدى.

اقمولا، شىعىس قازاقستان وبلىستارىنىڭ جەكەلەگەن اۋماقتارىندا نايزاعاي وينايدى، كۇندىز جەلدىڭ ەكپىنى 15-20 م/س كۇشەيەدى. كۇندىز شىعىس قازاقستان وبلىسىندا بۇرشاق جاۋۋى ىقتيمال.

كۇندىز قىزىلوردا، قوستاناي وبلىستارىنىڭ كەي جەرلەرىندە جەل 15-20 م/س كۇشەيىپ، كۇندىز قوستاناي وبلىسىندا نايزاعاي كۇتىلەدى.

سونداي-اق سينوپتيكتەردىڭ حابارلاۋىنشا، ماڭعىستاۋ وبلىسىنىڭ باسىم بولىگىندە، اتىراۋ، قىزىلوردا، وڭتۇستىك قازاقستان وبلىستارىنىڭ كەي جەرلەرىندە وتە جوعارى ءورت قاۋپى ساقتالادى.