اۋىل جولدارىن جاقسارتۋعا 147 ميلليارد تەڭگە ءبولىندى

الماتى. قازاقپارات - قازاقستان جول عىلىمي- زەرتتەۋ ينستيتۋتىنىڭ وكىلدەرى قازاقستاننىڭ نەلىكتەن الەمدە ەڭ ناشار جولدارى بار ەلدەر رەيتينگىندە ەكەنىن ءتۇسىندىردى، دەپ حابارلايدى «قازاقپارات» ح ا ا ءتىلشىسى.

«ءبىزدىڭ پىكىرىمىزشە، وسىنشاما تومەن كورسەتكىشتەرگە جەرگىلىكتى ماڭىزى بار جولداردىڭ جاعدايى اسەر ەتتى. مەن تاۋەلسىزدىك العاننان كەيىن سالىنعان جولدارىمىز جاقسى دەپ سانايمىن. كوپتەگەن ەلدەردە بولدىم، ولاردىڭ جولدارىنىڭ ساپاسىن باعالادىم. قازىرگى كەزدە ءبىزدىڭ كولىك جولدارىمىزدىڭ قۇرىلىس قارقىنى وتە جوعارى دەپ ايتا الامىن. ال بۇل جولداردىڭ پايدالانىلۋى - بۇل باسقا ماسەلە. مەملەكەت باسشىسى الداعى ۋاقىتتا جولداردىڭ ساپاسىن جاقسارتۋ ءىسىن قولعا الۋدى تاپسىردى، بىزدە 73 مىڭ شاقىرىمعا جۋىق جول بار»، - دەدى «قاز جول ع ز ي» ا ق-نىڭ پرەزيدەنتى باعدات تەلتايەۆ.

ەلباسىنىڭ جول سالۋ ۇيىمدارىنىڭ الدىنا قويعان ءبىرىنشى كەزەكتەگى مىندەت - شالعايداعى وڭىرلەر مەن اۋىلدارعا جول سالۋ.

«مەملەكەت باسشىسى ايتقانداي، ءبىز اۋىلدارعا كوڭىل اۋدارۋىمىز كەرەك. بيىلعى جىلى اۋىلدىق اۆتوموبيل جولدارىنىڭ ساپاسىن جاقسارتۋعا 147 ميلليارد تەڭگە بولىنگەن. كەلەسى جىلى تاعى 140 ملرد تەڭگە بولىنەدى. بىزدە اۋىلداردا جول جوق دەگەن پىكىر نەگە قالىپتاسقان؟ سەبەبى ءاۆتوموبيلدىڭ كوبەيۋى جولداردى سالۋ قارقىنىنان قاشان دا كوپ. جاڭا ەلدى مەكەندەردە الدىمەن ۇيلەر سالىنىپ، ودان كەيىن عانا جول قۇرىلىسى باستالادى. سوندىقتان اۋىل شەتىندە قاشاندا دۇرىس جول بولمايدى. ءبىز بۇل پروبلەمانى شەشەتىن بولامىز»، - دەپ سەندىردى ب. تەلتايەۆ.

سونداي-اق ول قازاقستاندا جەرگىلىكتى ماڭىزى بار اۆتوموبيل جولدارىنىڭ 40 پايىزىنىڭ جاعدايى جاقسى، 30 پايىزى - قاناعاتتانارلىق جانە تاعى 30 پايىزى ناشار ەكەنىن اتاپ ءوتتى.

اتاپ ءوتۋ كەرەك، جاھاندىق باسەكەگە قابىلەتتىلىك يندەكسىنىڭ نۇسقاسى بويىنشا، 2017-2018 -جىلدارى ەڭ ۇزدىك جانە ەڭ ناشار جولدارى بار ەلدەر رەيتينگىندە قازاقستان 137 ەلدىڭ ىشىنەن 115- ورىن العان.