ەلىمىزدە 1400 ۆاگون كەزەڭ- كەزەڭىمەن جوندەۋدەن وتەدى - «جولاۋشىلار تاسىمالى» ا ق باس ديرەكتورى

نۇر- سۇلتان. قازاقپارات - بۇگىن «نۇرلى جول» ۆوكزالىندا «جولاۋشىلار تاسىمالى» ا ق باس ديرەكتورى ميحاەل كورتيۋم ب ا ق وكىلدەرىنە بەلارۋس رەسپۋبليكاسىنىڭ گومەل قالاسىندا كۇردەلى جوندەۋدەن وتكەن جولاۋشىلار ۆاگوندارىن كورسەتتى، دەپ حابارلايدى قازاقپارات ءتىلشىسى.

«ءبىزدىڭ ماقسات - جولاۋشىلارعا ساپالى قىزمەت كورسەتۋ. 2020 -جىلدىڭ جازىنا دەيىن جەتكىلىكتى دەڭگەيدە ۆاگوندارمەن قامتاماسىز ەتۋگە ءتيىسپىز، سوندىقتان ەسكى ۆاگونداردى كۇردەلى جوندەۋدەن وتكىزەمىز جانە جاڭا ۆاگوندار ساتىپ الامىز. ۆاگونداردىڭ ساپاسى جاقسى بولۋىنا ءمان بەرەمىز، ياعني جوندەۋ جۇمىستارىنا ەكولوگيالىق تۇرعىدا تازا ماتەريالدار قولدانىلادى»، - دەيدى م. كورتيۋم.

ول جاقىندا 2020 -جىلعا ۆاگون ساتىپ الۋعا تەندەر جاريالاناتىنىن ايتتى.

«بۇگىن كورسەتىپ وتىرعان ەكى ۆاگون گومەل قالاسىندا كۇردەلى جوندەۋدەن ءوتىپ، قازاقستانعا كەشە جەتكىزىلدى. جوندەۋ جۇمىسىنا شامامەن 50 كۇن كەتتى. جوندەۋ بارىسىندا ۆاگونداردىڭ قاڭقاسى عانا قالىپ، قالعان جەرى تۇگەل جاڭارتىلدى. كۋپە ۆاگوندار پلاتسكارت ۆاگون بولىپ وزگەرتىلدى، ولار بۇدان بولەك 35 ۆاگوندى جاڭعىرتادى. سونداي- اق بيىل، 2020 -جىلى قوسىمشا 50 ۆاگونعا كۇردەلى جوندەۋ جۇمىستارى جۇرگىزىلىپ، ونىڭ قىزمەت كورسەتۋ ۋاقىتى تاعى 16 جىلعا ۇزارتىلادى. بۇلار - 1980 -جىلى شىعارىلعان. ەرەجە بويىنشا 28 جىل وتكەننەن كەيىن كۇردەلى جوندەۋ جۇمىستارى جۇرگىزىلۋى كەرەك. جاڭا ۆاگونداردىڭ جاتاتىن، وتىراتىن ورىندارى، تەرەزە جاپقىشتارى، دارەتحانالارى، جىلىتۋ جۇيەلەرى جاڭارتىلعان»، - دەيدى ول.

سونداي- اق، ول بۇل ۆاگوندار كومىرمەن دە، ەلەكتريكامەن دە جۇرەتىنىن ايتتى.

«2020 -جىلى تەندەر ارقىلى كۇردەلى جوندەۋدەن وتكىزىلەتىن ۆاگوندار ەلەكتريكامەن جابدىقتالىپ، زامان تالابىنا ساي بولادى. جالپى شامامەن 1400 ۆاگوندى كەزەڭ- كەزەڭىمەن جوندەۋدەن وتكىزۋ جوسپارلانىپ وتىر. قازىرگى ۋاقىتتا 2200-دەن استام ۆاگون بار، ونىڭ ىشىندە 670- ءى- «تۇلپار- تالگو» ۆاگونى»، - دەيدى باس ديرەكتور.

اۆتور زارينا قاھارمان