اسكەردەگى ساربازداردىڭ نەسيەلەرى 13 ايعا توقتاتىلادى

None
استانا. قازاقپارات - بانكتەر ارميادا مەرزىمدى بورىشىن وتكەرىپ جۇرگەن ساربازداردىڭ نەسيەلەرىن توقتاتادى، دەپ حابارلايدى قازاقپارات قورعانىس مينيسترلىگىنە سىلتەمە جاساپ.

اتالعان كەلىسىم مەرزىمدى قىزمەتتەگى ساربازدارعا قارجىلىق مىندەتتەمەلەرى بويىنشا اي سايىنعى تولەمدەرىن 13 ايعا كەيىنگە قالدىرۋعا مۇمكىندىك بەرەدى. بۇدان باسقا، قىزمەت وتكەرۋ كەزەڭىندە كرەديتورلار بەرەشەكتى ءوندىرىپ الۋ بويىنشا سوتقا ىستەر جانە نوتاريۋسقا وتىنىشتەر بەرۋدى توقتاتادى.

ەلىمىزدىڭ بارلىق ءوڭىرىنىڭ اسكەرگە جيناۋ پۋنكتىلەرىندە اسكەرگە شاقىرىلۋشىلاردا كرەديتتەر مەن قارىزداردىڭ بولۋى تۋرالى اقپارات جيناۋ جۇمىستارى جۇرگىزىلىپ جاتىر. نەسيەلەرى بار جاستار جەرگىلىكتى اسكەري باسقارۋ ورگانى باسشىسىنىڭ اتىنا قارىز الۋشىنىڭ اتاۋىن، تولەنۋگە ءتيىستى سومانى جانە قارىزدى تولەۋگە بايلانىستى باسقا دا دەرەكتەردى كورسەتە وتىرىپ ءوتىنىش بەرەدى.

قارىزدىڭ بار ەكەندىگى تۋرالى حابارلاپ ۇلگەرمەگەن ساربازدار بۇل ماسەلەنى ءبولىمنىڭ باسشىلىعىنا جازباشا ءوتىنىش بەرۋ ارقىلى شەشە الادى. بۇل رەتتە جەرگىلىكتى اسكەري باسقارۋ ورگانىنىڭ اتىنا بەرىلگەن تۋىستارىنىڭ وتىنىشتەرى دە قارالادى.

الىنعان مالىمەتتەر رەتتەۋشىگە بەرىلەدى. ءوز كەزەگىندە قر قارجى نارىعىن رەتتەۋ جانە دامىتۋ اگەنتتىگى اسكەرگە شاقىرىلعان ساربازدارعا نەگىزگى بورىش پەن سىياقى بويىنشا تولەمدەردى كەيىنگە قالدىرۋ قاجەتتىگى تۋرالى قارجى مەكەمەلەرىن حاباردار ەتەدى.

اسكەري بورىشىن اياقتاعان سوڭ جاستار جەڭىلدىكتەردى پايدالانىپ، جوعارى وقۋ ورنىنا ۇبت تاپسىرۋسىز تۇسە الاتىنىن دا ايتا كەتەلىك. بۇل رەتتە كوزگە تۇسكەن ساربازدار جوعارى وقۋ ورنىنىڭ گرانتى ەسەبىنەن اقىسىز وقۋعا تۇسە الادى.

سوڭعى جاڭالىقتار