قازاقستاندا 13 ميلليون گەكتار اۋماققا ەگىن سالىندى
«بۇگىندە كوكتەمگى ەگىس جۇمىستارى ەلىمىزدىڭ بارلىق وڭىرلەرىندە باستالدى، وبلىستاردىڭ جەدەل دەرەكتەرى بويىنشا 13 ميلليون گەكتار ەگىلدى، بۇل جوسپاردىڭ 62 پايىز، ونىڭ ىشىندە ءداندى داقىلدار - 9,5 ميلليون گەكتار نەمەسە 61 پايىز، مايلى داقىلدار - 1,9 ميلليون گەكتار نەمەسە 58 پايىز، كوكونىس-باقشا داقىلدارى - 248,1 مىڭ گەكتار نەمەسە 90 پايىز، كارتوپ - 163,2 مىڭ گەكتار نەمەسە جوسپاردىڭ 83 پايىز ەگىلدى. جالپى بيىلعى ەگىس الاڭى 23,4 ميلليون گەكتار بولادى، بۇل 2022-جىلعى دەڭگەيدەن 68,6 مىڭ گەكتار كوپ»، - دەدى ە. قاراشوكەيەۆ.
ءداندى جانە ءداندى-بۇرشاقتى داقىلداردىڭ ەگىس الاڭدارىن 117 مىڭ گەكتارعا، ازىقتىق داقىلداردى 36,5 مىڭ گەكتارعا جانە قانت قىزىلشاسىن 6,7 مىڭ گەكتارعا ۇلعايتۋ كوزدەلىپ وتىر.
استىق، كوكونىس-باقشا، كارتوپ بويىنشا جوسپارلانعان الاڭدار ىشكى نارىق قاجەتتىلىكتەرىن تولىق قامتاماسىز ەتۋگە مۇمكىندىك بەرەدى.
«شارۋالار بارلىق قاجەتتى رەسۋرستارمەن قامتاماسىز ەتىلگەن. كوكتەمگى ەگىس جۇمىستارىن جۇرگىزۋگە، اۋىل شارۋاشىلىعى تاۋارىن وندىرۋشىلەردى تۇقىممەن، اگروحيميامەن، تەحنيكامەن قامتۋ، قارجىلاندىرۋ ماسەلەلەرىن ۇيلەستىرۋ ماقساتىندا رەسپۋبليكالىق جەدەل شتاب قۇرىلدى، ونىڭ قۇرامىنا بارلىق مۇددەلى ورگەكتارندار مەن ۇيىمدار، وبلىس اكىمدەرىنىڭ ورىنباسارلارى ەنگىزىلدى. جىل باسىنان بەرى جەدەل شتابتىڭ 5 وتىرىسى ءوتتى»، - دەدى مينيستر.