جامبىل وبلىسىندا «جايلى مەكتەپ» جوباسى اياسىندا 13 مەكتەپ سالىنباق

جامبىل وبلىسى. قازاقپارات – ق ر پرەزيدەنتى قاسىم- جومارت توقايەۆ بايزاق اۋدانىندا جاڭادان اشىلعان كوكتال ورتا مەكتەبىنە باردى، دەپ حابارلايدى اقوردا.

مەملەكەت باسشىسى جامبىل وبلىسىنا جۇمىس ساپارى بارىسىندا بايزاق اۋدانىنىڭ كوكتال اۋىلدىق ورتا مەكتەبىنىڭ جۇمىسىمەن تانىستى.

قاسىم- جومارت توقايەۆ ۇستازدار قاۋىمىمەن جۇزدەسىپ، جاڭا ءارى جايلى مەكتەپتە ءبىلىم الىپ جاتقان وقۋشىلارعا تابىس تىلەدى.

«قازاقستاننىڭ بولاشاعى - جاستار. مەن جاستارىمىزعا ءاردايىم سەنەمىن، سىزدەردى قولدايمىن. ومىرلەرىڭىز جارقىن، جولدارىڭىز اشىق بولسىن دەپ تىلەيمىن» ، - دەدى پرەزيدەنت.

ءبىلىم ورداسىنىڭ عيماراتى بىلتىر سالىنىپ، پايدالانۋعا بەرىلگەن. مەكتەپ ديرەكتورى ايات سەنبەك ۇلىنىڭ ايتۋىنشا، ءبىلىم ورداسىندا 1207 وقۋشى وقيدى.

ءۇش قاباتتى مەكتەپ عيماراتى گازبەن جىلىتىلاتىن دەربەس قازاندىققا، ورتالىقتاندىرىلعان اۋىزسۋ جەلىسىنە قوسىلعان. مەكتەپ ماتەريالدىق- تەحنيكالىق جاعىنان تولىق جابدىقتالعان: 32 وقۋ كابينەتى، 4 كومپيۋتەر كابينەتى، 2 لينگوفون كابينەتى، 1 روبوتتەحنيكا كابينەتى، 1 سپورت زالى، شەبەرحاناسى، كىتاپحاناسى، مەديتسينالىق پۋنكتى جانە اسحاناسى بار. مەكتەپتە ماڭايداعى اۋىلداردان قاتىناپ وقيتىن بالالار ءۇشىن كولىك تاسىمالى ۇيىمداستىرىلعان.

2023-2025 -جىلدارى «جايلى مەكتەپ» ۇلتتىق جوباسى اياسىندا جامبىل وبلىسىندا 9500 ورىندىق 13 مەكتەپ سالۋ جوسپارلانىپ وتىر. ونىڭ سەگىزى كەلەسى جىلى پايدالانۋعا بەرىلۋگە ءتيىس.

جالپى، پرەزيدەنتتىڭ تاپسىرماسىمەن 2023-2025 -جىلدارى «جايلى مەكتەپ» ۇلتتىق جوباسى اياسىندا رەسپۋبليكا بويىنشا 800 مىڭ وقۋشىعا ارنالعان 400 دەن استام جايلى مەكتەپ سالىنادى.