شەتەلدىك جۇك تاسىمالداۋشىلار قازاقستان اۋماعىمەن 13 مىڭ زاڭسىز رەيس جاساعان
«اۆتوكولىكپەن جۇك تاسىمالداۋ لوگيستيكاسىندا پروبلەمامىز بار. ءبىزدىڭ مەملەكەتىمىز حالىقارالىق تاسىمالداردى رەتتەيتىن كونۆەنتسيانىڭ مۇشەسى بولىپ ەسەپتەلەدى. سونىڭ اياسىندا 43 مەملەكەتپەن جۇك تاسىمالى جولعا قويىلعان، ياعني ءبىز ولاردىڭ اۋماعىندا، ولار ءبىزدىڭ اۋماقتا جۇك تاسي الادى. ءبىراق، قازاقستان اۋماعى ارقىلى وتەتىن جۇكتىڭ 70 پايىزىن شەتەلدىك كومپانيالار، 30 پايىزىن عانا قازاقستاندىق كومپانيالار تاسىمالداپ كەلەدى. ءبىز مۇنى ادىلەتسىزدىك دەپ ەسەپتەيمىز. ول جاعدايعا ۇشىراتقان - قارجى مينيسترلىگى مەن يندۋستريا جانە ينفراقۇرىلىمدىق دامۋ مينيسترلىگى. ويتكەنى، كەدەن ورگاندارى مەن كولىك ورگاندارى وسى مينيسترلىكتەرگە باعىنىشتى»، - دەدى ساراپشى پروكۋراتۋرا ورگاندارىنىڭ بيزنەس وكىلدەرىمەن كەزدەسۋىندە.
پالاتا وكىلىنىڭ سوزىنە قاراعاندا، ماسەلەنى پرەمەر-ءمينيستردىڭ دەڭگەيىندە كوتەرگەننەن كەيىن بارىپ ناقتى جاعداي ايقىندالعان.
«بىزگە زاڭسىز كىرگەن كولىكتەردىڭ كولەمىن تاپتىق. جىل سايىن شەتەلدىك كومپانيالارعا جۇك تاسىمالداۋ كۆوتاسى بەلگىلەنەدى. سول كۆوتادان تىس 13 مىڭ رەيس زاڭسىز ورىندالعانى بەلگىلى بولىپ وتىر. قازىر وسى فاكتى بويىنشا تەكسەرۋ بولىپ جاتىر. بۇل رەيستەردىڭ ءبارىن وتاندىق كومپانيالار ورىنداۋى كەرەك ەدى. 13 مىڭ رەيس دەگەنىمىز - شامامەن 45-50 ميلليارد تەڭگەنىڭ كولەمىندە كىرىس دەگەن ءسوز. ونىڭ ىشىندە سالىعى، جۇمىسشىلاردىڭ ايلىعى، الەۋمەتتىك تولەمدەرى بار. وسىنشا دۇنيە سىرتقا كەتىپ جاتىر. ءوز كومپانيالارىمىز ورىنداسا، بۇل اقشا ىشتە قالار ەدى»، - دەيدى بولاتبەك اليەۆ.
سونداي-اق، ول اتالعان 13 مىڭ رەيستىڭ كوبى ەۋروپامەن ارادا قاتىنايتىنىن ايتتى.
«بۇل رەيستەردىڭ كوبى ەۋروپا ەلدەرىمەن ارادا قاتىنايدى. ونداي رەيستى ورىنداۋدىڭ ءبىر جاق قۇنى 6-7 مىڭ ەۋروداي بولادى. بارىپ-كەلۋىن ەسەپتەسەك، ءار رەيستىڭ قۇنى 13 مىڭ ەۋرو دەگەن ءسوز. وسىنى 13 مىڭ رەيسكە كوبەيتسەڭىزدەر، اۆتوكولىك تاسىمالىنىڭ دۇرىس قاداعالانباۋى سالدارىنان عانا قانشا كىرىستىڭ سىرتقا كەتىپ جاتقانىن تۇسىنۋگە بولادى»، - دەدى «اتامەكەن» ۇ ك پ وكىلى.