وتكەن جىلى 13 مىڭ بالاعا مۇگەدەكتىك بەرىلدى – د س م

نۇر-سۇلتان. قازاقپارات – ق ر دەنساۋلىق ساقتاۋ ءمينيسترى اجار عينيات ەلدەگى مۇگەدەكتىك كورسەتكىشتەرىن جانە ونىڭ باستى سەبەپتەرىن باياندادى، دەپ حابارلايدى قازاقپارات ءتىلشىسى.

«مۇگەدەكتىك - حالىق دەنساۋلىعىنىڭ ماڭىزدى كورسەتكىشتەرىنىڭ ءبىرى، الەۋمەتتىك جانە ەمدەۋ-الدىن الۋ شارالارىنىڭ ساپاسى مەن تيىمدىلىگىنىڭ ينديكاتورى بولادى. مۇگەدەكتىك پروبلەمالارى مەديتسينالىق، الەۋمەتتىك جانە كاسىپتىك سالالارعا اسەر ەتەتىن ۆەدومستۆوارالىق سيپاتقا يە. مۇگەدەك ادامداردىڭ سانى سوزىلمالى اۋرۋلارعا جانە حالىقتىڭ قارتايۋىنا بايلانىستى ءوسىپ كەلەدى»، - دەدى ا. عينيات ۇكىمەتتىڭ بۇگىنگى وتىرىسىندا.

1- قاڭتارداعى جاعداي بويىنشا مۇگەدەكتەردىڭ جالپى سانى 700 مىڭعا جۋىقتاعان، ونىڭ ىشىندە 18 جاسقا دەيىنگى بالالار - 98,2 مىڭ ادام.

«اۋرۋ سالدارىنان بولاتىن جالپى مۇگەدەكتىك قۇرىلىمىندا ءبىرىنشى ورىندا %18 - پسيحيكالىق اۋرۋلار، %15 - جۇرەك قان اينالىم جۇيەسى اۋرۋلارىنان جانە %12 - ءتۇرلى جاراقاتتان بولعان مۇگەدەكتىك جاعدايلارى تۇر. بالالار اراسىنداعى العاشقى مۇگەدەكتىكتىڭ %31 - تۋا بىتكەن دامۋ اقاۋلارى، دەفورماتسيا جانە حروموسومالىق اۋىتقۋلار بولسا، %22 - نەرۆ جۇيەسىنىڭ اۋرۋلارى، %17 - پسيحيكالىق بۇزىلۋ جانە مىنەز- قۇلىقتىق بۇزىلىستار. 2021-جىلى 13131 بالاعا العاش رەت مۇگەدەكتىك بەلگىلەنگەن»، - دەدى مينيستر.

اۋرۋلاردىڭ پروفيلاكتيكاسى، مۇگەدەكتىكتى ەرتە انىقتاۋ جانە ونى تومەندەتۋ ماقساتىندا جىل سايىن العاشقى مەديتسينالىق-سانيتاريالىق كومەك دەڭگەيىندە ەرەسەك تۇرعىندار مەن بالالاردىڭ نىسانالى توبىنا سكرينينگ جۇرگىزىلەدى.

ەرەسەك ادامدار اراسىندا جۇرەك-قانتامىر جۇيەسى، قانت ديابەتى، گلاۋكوما جانە ونكوپاتولوگيا اۋرۋلارىن ەرتە انىقتاۋعا تەكسەرىلەدى جانە 2021-جىلدىڭ قورىتىندىسى بويىنشا 12,2 ميلليون ادام سكرينينگپەن قامتىلعان.