قازاقستان كومانداسى سۋردليمپيادادان 13-ورىن الدى
بۇل تۋرالى دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى مالىمدەدى، دەپ حابارلايدى قازاقپارات.
«برازيليانىڭ كاشياس-دۋ-سۋل قالاسىندا وتكەن جازعى سۋردليمپيادا ويىندارى اياقتالدى.
1-15- مامىر ارالىعىندا وتكەن جارىستا الەمنىڭ 73 ەلىنەن 2500 گە جۋىق سپورتشىسى ونەر كورسەتىپ، باق سىنادى.
بايراقتى باسەكەدە قازاقستان سپورتشىلارى 28 مەدالعا قول جەتكىزدى. ونىڭ ىشىندە 3 ەۋى التىن، 7 ەۋى كۇمىس جانە 18 ءى قولا»، - دەدى ۆەدومستۆودان.
ورتالىقتىڭ جازۋىنا قاراعاندا، قازاقستان بۇل ناتيجەمەن جالپى مەدالدىق ەسەپتە 13-ورىنعا ورنالاستى.
ءتىزىمنىڭ توپ باسىندا 137 مەدالمەن ۋكراينا تۇر. ەكىنشى ورىندى 54 مەدالمەن ا ق ش ەنشىلەدى.
ۇزدىك ۇشتىكتى 40 مەدالمەن يران سپورتشىلارى تۇيىندەدى.
«ەلىمىزدىڭ سپورتشىلارى برازيليادان 19- مامىر كۇنى ساعات 3.25 تە الماتى قالاسىنا ۇشىپ كەلەدى»، - دەپ مالىمدەدى ۆەدومستۆو.